今早哎吔家姊是第二位再破壞我立例黎明翻瞓的人：「細佬，我一陣飛過去大馬啦，你將『家和萬事興』譯咗英文啲歌詞唱多次，錄去你師弟佢手機度喇，佢奉旨一埋門就騰雞嘅……你唔好唱到咁鬼佬咁𠼱脷喇吓。今朝我叫你個仔阿Howard一早執埋今次返嚟幾件行李呢，叫人車佢過去你度住，我一唔喺度，啲衰人就算冇搜查令，都乘機嚟我後欄呢邊博亂……呀，你未搬嗰批垃雜嘢，係呀，你唔捨得掉嗰個手風琴仔呀，我呃你阿Howard等佢知吓，好多值錢嘢你都當冇到，但呢件佢細個嘅嘢，你居然喺舊屋當寶咁跟身搬埋嚟呀……喂，講鬼咗咁耐，都唔同我講番兩句……打過你。」
我當然要堅忍不動手還拖，否則又講上一小時，但接力賽是蓋家司機拿着摺牀及行李，隨着孝活站在我牀前。
「我瞓地下仲好，响挪威我都係聽醫生，瞓啲硬地，先至仲快脆好番……」
「我戒緊煙，你唔好引我食番呀吓。」
「我月尾幫手做埋個冰島音樂會就扯㗎啦，我見過你就得㗎啦，我唔恨留喺香港。」
「咁就係，香港啲一拍兩散，棧眼冤……有人喺嗰便，等你返去呀？」
「有又得，冇又得……唔係好緊要……」
「好……你係得呢樣似我……」這個四張幾，跟以前我口中的死蠢，升格好幾倍，對我這句話立露宮廷片的面露惶恐。
「阿宋小姐阿Maria都喺裏面……」孝活把話壓在喉嚨蒂，吩咐司機離去，用行李在我面前掩漾，擋住在廚房進出的唯一一個女人的身影，她也很大方得體的來往自如。
「你兩個想唔想食啲嘢，我煮咗先行吖。」恰到好處的聲氣，令人舉旗致敬。
「你趕住行去邊？」用個亨利八世的衰樣。
「ＢＢ今日又有針要打吖嘛。」
「乜得咁多針，成日都要去打？」
孝活竟然撲出來做辯護律師：「你舊時唔知之嘛，我同阿妺細個，成日都唔知要打幾多針，pad pad腫到坐低都痛到喊呀，哈……」
我真詫異這兩個人已是共犯，我在啷口洗面呷皮蛋粥時，兩位主持人將我貶為搭不到線的聽眾，這個忤逆仔，將他幾年來在北歐嘅坎坷又感人心弦的近代史，向女主持盡訴他一手的心聲。