自從孝活在倫敦回到吉隆坡，就算由朝到晚兩仔爺並無撞到面，他都心思思無情白事留言幾句在手機，但今晚他通知我會聯同愛妻Pamela，哎吔契女ＢＢ碧翠絲，前來我這邊，只是好好的團聚，兼且哎吔家姊為瑪莉亞一單埋門的樓盤交易壓陣，雙雙過來慶功。唯獨我，想起今朝晨早蓋大班在北愛爾蘭來電，沒有閒話家常，卻提出幾個國家城市的名字，有的是他此刻腳踏的地方，還有冰島，以及新西蘭，之後就有醉態而沒有再說下去，也難怪，那是對方半夜，但怪就怪在他回復幾年前的聲氣。三父女擁有自出自入的門匙，ＢＢ卻領着她的男朋友Dan仔前來，還抱着小羊子放到地上，見屋大又無傢俬，三個像滑溜冰般跑來跑去，Pam仍講手機，面色不大好看：「俾阿Dan仔喺度玩一陣，你唔好出門口唔好返農場，放心，我哋會親身送佢返屋企……」
「係咪又有乜嘢事？」
「老竇，我哋個個都要離開呢度一陣……」
「呢間屋？點解？」
「ＰＫ爹哋，頭先農場同學堂好亂。」
「又有衰人報仇搗亂？」
「唔係人，係啲四隻腳嘅都失晒常性，後山咁遠啲馬，都聽到佢哋猛撞木欄。」
「課室呀大堂呀，周圍都有啲曱甴呀，檐蛇呀，都飇晒出嚟。師兄話末日到，啲大大細細動物先至會咁……」
「我明啦，阿師兄，天奴叔，有冇吩咐大家點？」
「我哋即刻搵到阿蓋Uncle，佢響電話淨係話，啲天災橫禍鬥快，天火焚城已經唔興，流行病菌永無休止最無敵，地球暖化都成十年，兩樣加埋係天作之合，但知還知，個個國家都等運到，情願等天收，窮人冇工做，仲饑荒，有錢人冇得去火星歎世界……話得事啲元首，疊水嘅權貴，條命都好有限，長日將盡，倒不如用嚟想嗰樣做嗰樣，滿足佢自己先……」瑪莉亞已開門攙插扶着哎吔家姊氣急踏進來。「呢啲嘢，唔通大家今日先至知衰，我喺車同我個仔講得清清楚楚，我哋大大細細，爛船三斤釘，都仲有得你望吓我，我望吓佢，試諗吓我哋日日鼓勵嗰班幫我哋打造農場同學堂，嗰班有志氣嘅老嘅嫩嘅，佢哋又點？我會扐晒我啲身家出嚟，叫佢哋唔好驚，唔好心淡，我哋可以全世界去搵定一笪要捱到死嗰日嘅竇口，都唔可以走夾唔唞咁，得把口但就唔見咗人，乜嘢係共患難吖？」ＢＢ和Tan仔停下來，眼擎擎望着最可以和她通電的婆波……「阿ＢＢ未必知我今晚講過乜，佢手挽手個靚仔都唔知呢個老嘢講乜，我實死先過你哋，你哋總有一個會記得。阿ＢＢ呵？俾婆波攬吓。」
「婆波，你都錫吓『釘哥哥』，佢掛住佢媽媽。」只有ＢＢ開口，哎吔家姊才會青筋放鬆，眼淚流，連瑪莉亞遞給她的熱茶，也無力接過。瑪莉亞異常冷靜，為罕見全場沒有再發聲的每個人倒茶，再去打開半個窗……「我知喺呢度，我最冇資格講嘢，但我想講，我阿爸阿媽好早就死咗，到想同我結婚嘅男人，未曾曾就撞機又死咗，但偏偏剩低個女喺我肚度，我都冇時間去諗咁多，俾心機去養大佢先，但我點都估唔到，佢大咗又有事業又嫁到個好老公，仲生咗有個好得意嘅ＢＢ女，嗰啲日子，我都已經就嚟五十歲，𠴱段日子，我咁大個人，先至每晚好好地瞓得着，呢種日子，連一年都冇，ＢＢ嘅爸爸媽媽，又試撞車死咗救唔番，但ＢＢ喺架車裏面就冇事，我當陣簡直每日唔知應該點做人，我唔知我做錯咗乜嘢事，剩番一個未夠一歲嘅ＢＢ，我點都唔可以死咗就算……我人又老，租間冇窗嘅屋暱埋，我望住個ＢＢ唔敢喊……到無端端遇到阿ＰＫ， 人哋係太子爺大老細，我以為個天再整蠱我，但係，終於人人都見到，係佢嚟救番我同ＢＢ，有佢，先至有你哋逐個逐個出現，有佢有你哋，樣樣壞事都變到好事，我已經好滿足……如果個天要揀我哋嚟罰，就再罰我先……」瑪莉亞不再流淚，交給我接棒……「或者個天搞錯咗你個File呢，咪逐啲還番啲債俾你……」那位四歲的Dan仔，智商失調，竟然問側邊很鎮定的碧翠絲：「咁個ＢＢ，而家去咗邊？」