見到母親勞碌了一日，未有流露病容，穿梭廚房，阿Pam就慶幸及時上路來團聚，及時帶個女婿來沖喜，與孝活力薦二人求學時都精於弄糕點，堅持飯後由他倆上陣來孝敬老人家。
瑪莉亞此時此刻，電話內容長或短，我都無謂加多減少，難得人齊，只要我將喜形於色與口水吞回落肚，「阿親家，見得一面得一面，你要趕返去啦，朝早有班機。」一句就係人都明。
手機裏的瑪莉亞壓住喉嚨一輪嘴：「我都唔知係好消息定壞消息，本來『後底乸』多數過唔到今晚，但個醫生話睇吓再輸血俾佢，或者可能等得到屋企人，阿天奴叔周圍打晒電話搵公司啲人，有冇AB型，問着我我多口話我都係，天奴叔唔好意思收咗線，我諗咗一陣，見阿ＢＢ瞓咗，我叫阿師弟過嚟睇實佢，我就去咗醫院簽字輸血，我唔敢話你知，我好精神，乜事都冇，仲肚餓去食咗碗粥……講完啦，我唔驚你鬧我，明明我可以捐俾呢個人，佢會唔會咁都冇擘番大眼起番身，就唔關我事……」
「你做得好好呃，係你先至做得出……錫你一啖……同我錫ＢＢ一啖……裏面好嘈，唔知乜事，一陣再打俾你……」，此時後鍋的伙計慌忙走出來，「阿鄺大姐又試企唔穩，送咗佢返屋企先……」，人人反應神速，孝活已將岳母孭上背脊，哎吔家姊為好姊妺敷熱毛巾，阿Pam猛搓阿媽手指穴位，租車的司機已衝入店中，老頭子還掛住叫人順手將疍糕帶走，認真打得少。幸好逼爆的豪華七人車，事主還講得出如何抄捷徑的地址，中途又忍不住嘔吐在前排車位的寃家頭上，真箇大快人心。「上天弄人」這四隻字，等同阿耶和華又好，釋迦牟尼又好，也會夜晚失眠，就當我哋一隻隻公仔咁玩。
凌晨的唐人街仍有半中半西的醫生前來出診，飯店的忠心夥計夫婦，親身陪同過夜，阿Pam孝活情願不回酒店，已佔盡斗室的空間。
廚房還連接一個晾衫位，哎吔家姊面露青筋，用她的尖手甲猛篤那老而不的心口，「好彩當陣時冇俾你追到咋，你睇吓，是但而家，做着你邊個女人都折墮，猛謀人害人嗰個，請問佢得到啲乜？你偏偏等佢半條人命嗰陣，揀呢啲日子，有咁遠飛嚟咁遠，佢瞓喺醫院有乜冬瓜豆腐，擺明都唔使旨意見到你一面，我係都好憎佢，但呢鋪我估唔到，我仲更加憎你……阿Howard daddy，唔知嗰劑藥煲好未？我入去餵阿素芳食，佢唔死得，我唔俾得佢死。」鐵娘子大步衝回入屋，老而不面懵懵噴雪茄，我的瑪莉亞又在手機彈出幾行字。我也躋身出去那幾呎地方。「阿親家老爺，你係第一個知道，你個未來親家，即係我個未來老婆，佢話醫院宣布，你位夫人，係大馬時間，朝早九點未搭八離開咗。」他原來也有常備的表情，手下亦同時來電。「唔使講，我知，叫公關答話，我上緊機，希望快啲返到嚟……」阿Pam也收到電話走出來，「Daddy，呢度冇威士忌呀，有五加皮，俾杯你吖，好唔好呀？」這個新抱，與我的瑪莉亞，有雷同的地方，喜歡留一把長頭髮，又喜歡綁起在後面，未被麻甩佬欺凌糟蹋過，就永遠還有三斤釘。