原來哎吔家姊不會真心懲罰師弟這鑊「回塘老雞湯」，起碼四周圍見拿督夫人身跟這位冒起走紅一時的戲曲老師黃天蕩失寵，無一不趁高興打落水狗。
「阿易大哥，阿易老闆，我邊咁有藝術細胞，周身冇蚊咯，仲敢學人開公司做廣告設計做宣傳吖？」
「你唔早啲講，唔使審，即係你師姐抦埋你，等你做隱形人悔改。」
「我本來想返香港早死早着，又俾佢省多次……」
「哦，你咁仲唔𦧲飯應，呢個檔口實係佢頂番嚟俾你㗎喇，咁你就俾心機喇，慈善騷張海報你諗㗎？你贖罪都唔使咁離譜，笑大人哋個口，執少佢啲相啲皺紋咪算，你睇吓……眼冤……」
「我有勸佢，又俾佢抦，話淨番兩條苦淚紋，叫我執走埋……佢仲教精我，如果我出到名，呢度咁多阿太知我影相執相最靚，就會接生意接到年終無休，唔見晒啲錢，唔使半年就搵返晒返嚟喎。」
「咁你就將佢心口條事業線重手啲喇。我唔理你，我哋個ＢＢ，佢得嗰歲零，搞到成個老人精咁。」
「好多人鍾意佢㗎。」
「話知，世界變呀，四歲吸毒，六歲買股票，八歲嫁完又離婚㖭呀……」
「阿易大哥，你命大，做乜講乜都冇人嬲你……」
「有樣嘢係你先至做到嘅，阿師姐有冇同你提起過佢個心肝蒂阿蓋大班吖？」
「吓？我唔識應你呀……我唔敢答你……」
「你識嘅，你個人係心軟之嘛，你如果做一個湁吓湁吓嘅角色，包冇人懷疑你，人人當你冇到，咁你就可以幫到阿蓋大班一條生路，幫到佢即係幫到我阿家姊你阿師姐，咁佢成世都會錫住你，乜嘢恩都報晒……」
「唔好喇，你諗到嘅嘢，我邊會做得到？」
「試吓囉，我講咗嘅嘢，我夠收唔番咯。」
「唔係咧……」
「我講多兩句，你唔好掩耳仔……」
「我去作過福，應承菩薩我醒醒定定……」
「做得好，啱㗎，你得閒去問吓菩薩，阿蓋大班精過鬼，但上個月喺挪威定唔知瑞典，是但喇，俾人將軍兜督，爭啲死喺雪山上面，佢想搵我度匿埋，點知我同我個仔咁啱又返咗嚟，累到阿蓋大班過街老鼠咁……佢想走返嚟，當見佢老母，我家姊你師姐，最後一面……」
「……陰……陰功……」
「你問吓菩薩，佢個老母，知道咗之後，情願啲黑手追到嚟大馬，點對付佢個仔，都情願自己頂上，食幾粒子彈又好，落降頭又好，捉佢做人質又好，佢都頂硬上，總之唔准個仔返嚟……」
「咁我求阿菩薩打救佢兩仔乸呀？」
「你個菩薩好得閒呀？仲有一樣，聽埋我講好冇？你呀……呃晒你啲錢，嗰個韓國婆，可能乾塘，有人喺新加坡見到佢喎……」
「哼，佢敢行一步返嚟，我告到佢冇地匿。」
「咁高檔呀？咪好似話佢係有料啲人？你小心呀，你惹番佢，今次命都冇埋呀。阿師姐自己都咁煩，佢晤得閒救你㗎啦。點解我講咗去開叉筆呢，聽聞今次……啲追到嚟捕阿蓋大班啲人馬呢，搵咗你個韓國婆做二五仔，你問阿菩薩係味攞景？」
我有好幾年戒絕這種口脗去開波。回巢分頭向孝活、未來老婆，請他們對我的詭計評分，兩人都太凝重，無暇欣賞。只有哎吔家姊，嘉許我仗義東山復出。