天未光兩仔爺已滾水淥腳準備起程去機場，孝活管接管送的老友Olaf我直譯他的挪威名做「我甩褲」，一二三已把所有行李搬上借給我們環遊奧斯陸七天，彩藍色的旅行Van，肥仔爛瞓，被拋上車內，以為又上路，孝活樂意見到牠在我們離開後才醒來，與照顧了半年的養父再又同一屋簷下，我聽過有獸醫說狗也會發夢，可能過去一個禮拜，我們兩個只是牠創造的角色。我又開始傳染了孝活的老人成嫩仔。果真小狗子沒有開眼，只好向「我甩褲」擁抱兼猛講「Tusen Takk兔先得」言謝。
過關後各自檢看手機，收到同一功敗垂成的錄音，孝活的同袍靜靜雞為我籌謀，人到吉隆坡就即去婚姻註冊處與宋瑪莉亞搶閘簽字，殊不知繁文手續無一能偷雞。我那邊是未來新娘親自報憂，我們偉大的，尊敬的，拿督夫人攔途殺出通告，我們到埗的早上，她要抱走ＢＢ去為城中最高檔的家庭雜誌拍封面照，看來是我的屎橋已為哎吔家姊識破。我從不用飛機上的熱毛巾，破例用來增加睡意，與鎮定如常的孝活自我安慰，瞓得幾耐就幾耐，船到橋頭自然直，但飛機在雲霧中，不知應該是撞山抑或墮海，我終於將病菌傳染給乖仔，他罕有的笑到拍椅拍枱，空姐也回頭報以專業的硬笑。
昏迷是唯一逃避的良方。宋瑪莉亞像戰亂火車站失散的家人，從人堆衝出來重聚，用熱到流汗的手摸我凍冰冰的鼻哥。
「你做乜咁面青青？」
「係咩？暈機浪啩……Howard你老友喺電話點講？」
「佢話喺註冊處見到我哋阿拿督夫人……」
「咁咪硬晒軚？」
「咁又冇喎，仲好開心咁叫我哋去咗註冊處先，佢用咗好多人士，今日註唔到冊，佢拍心口，好快你哋就點都註到冊先至擺酒喎。」
「佢真係神仙嚟嘅，係咪你通咗水講咗俾家姊聽㗎？」
「我作死咩，塞車呀，我哋去咗先喇。」
聽聲氣也不似要去刑場打八十大板，我醒起行李內，有件拆彈武器。
註冊處有個阿頭的會客室，已被家姊和ＢＢ在佔有，「你哋餓唔餓呀，使唔使去食咗晏先？」
「ＢＢ！問吓熊仔餓唔餓？」我迅速拿出一本咸豐年的古董雜誌揭到一頁，「ＢＢ，你認晤認得呢個係邊個呀？」醒目到震的一粒人仔竟然知曉要救我出火海，用手仔指着老太君，「……婆波……」哎吔家姊也估不到我聲東擊西，「乜嘢唧？俾嚟睇過，哎吔，我自己都唔認得呢個係我？」在車程中預演台辭的最隹男女配角衝前撥火，「嘩，阿姐你真係靚到冇人有……」
「喺巴黎做香水廣告呀，邊個唐人試過咁威呀。」
「你哋後生梗唔知邊個係嘉寶仙，一代名模仲紅到做埋明星㖭呀，睇唔睇到家姊幅相上面寫乜嘢？」
「封你做東方嘉寶仙囉，咁威都唔見你提過嘅？」
「唏，去食晏先喇，女人呢，唔係淨係靚就得，都要睇吓條命先得嘅，呢個嘉寶仙好傳奇㗎，俾啲報紙傳佢係變性人，傳極都冇事嗰喎。」
「吓？邊似呀……」
「係呃，咁有台型。」
「臨尾仲跳樓死㖭呀。」我們三個罪犯都配合瞪眼張口，「食飯坐低慢慢講……ＢＢ，烤鍋粥粥都有買咗嘢俾你同熊仔呀？」成功點起家姊的癮頭，翹着宋瑪莉亞行先一步，細數嘉寶仙的舊聞。於是，我抱起ＢＢ，再加一隻新貴熊仔，人人得到特赦，贏了個馬鼻。