有時很矛盾，汽水蓋朝見口晚見面，好心借意就問我想不想打本重出江湖，但我開始貪生，發夢都估不到，這大半年藤㨢瓜瓜㨢藤，惹來一個又一個心地好的人，兼且都是天賜的奇人。我開始怕死，日日未停止過遊戲人間，捨不得再過另一種生涯。
三個男人老狗，原來在山旮旯都見過彭美拉的歲幾細佬半夜陰魂不散，並不是出來嚇人，走來走去惹人憐愛，等於死心不息，要是我突然暴斃，我都會晚晚搞到大家冇覺好瞓。今晚家姊警告，晚飯可以叫九大簋，但不要開口招惹那位受苦受難幾十年都不能超生的小朋友，尤其是更加要珍惜身邊有個精靈的ＢＢ，都不知託賴是誰的福氣。在「景然棧」埋位，搞氣氛是年中無休的我，先再歌頌家姊有創作急才，再讚孝活人盡其才，在香港與ＢＢ飯後玩吸血殭屍玩到大癲大肺，殊不知這對拍檔渾身解數，手到拿來，汽水蓋忍不住追問：「阿Howard應該頒個金像獎最佳導演俾你，阿ＢＢ妺就攞硬最佳女主角，但你點教佢，飊出去就掘實嗰個後底乸，又識撲去攬實阿Pamela猛喊仲叫佢姐姐？」
「ＢＢ不嬲都叫佢姐姐㗎喇，唔通叫佢大嬸。」
「咁又猛話好好痛痛呀？」瑪利亞喝着她的感冒茶，也忍不住插嘴：「佢成日都話好痛，唔抱佢又話痛，唔見咗隻熊仔又話痛，呢隻字都唔知佢邊度聽番嚟咁鍾意講。」
「咁獎勵人哋先得㗎，食雪糕好唔好呀？食埋我嗰份吖？」在梳化椅擒來擒去的ＢＢ，聽到雪糕兩字就猛點頭，家姊哄話吃了正餐才吃雪糕，ＢＢ就識猛搖頭兼話痛痛。我也同意，一個痛字，做人由細到大，密度最高。孝活在電話得知太子女回家繼續炒作，我第一次見他一聲大一聲細，有時還單着眼落藥，結果對方應承怎也過來跟大家吃甜品。
我繼續做八卦公：「家姊，嗰個『等天收』論靚就真係冇份個喎，點解佢咁有把炮，又整走到阿彭美拉個阿媽，個細佬哥係男仔，仲條命都保唔住，咁先至最陰毒……」一開正家姊個槓，就可以安於做聽眾，「佢乜嘢出身唧，原本係私家看護之嘛，個一家之主都有責任嘅，」
「有三妻四妾，大把人係咁喇，但噚日見到佢我唔敢笑，鬥雞眼就唔奇，佢對眼核貼錯門神咁，一隻去左一隻去右，真係惡頂……」汽水蓋竟然識將眼珠各走極端弄到這個滑稽表情：「係咪咁呀？哈哈……」ＢＢ看到走過來，向大家首演一個鬥雞眼平分秋色，嚇到瑪莉亞怒斥：「唔准呀，再做唔俾雪糕你食！」家姊也失笑，惟有幫拖：「ＢＢ咁樣唔靚女，知唔知呀，冇人教佢嗰喎，佢乜嘢都見一次就識做，Maria你抱佢出去行吓仲好喇……」
「呢度個老闆隻狗，竟然帶返嚟櫃位，識㩒計算機收錢，有啲客嚟食飯都係因為想睇佢……唉，瘋狂世界……」瑪莉亞抓起ＢＢ索性去看噴水池。「講番轉頭，當年我過嚟做戲呀登台呀，阿素芳呢，好捧場，差啲同我結拜，即係阿太子女親生阿媽呀。」
「佢呢種唔係一般Strabismus，鬥雞都仲有得矯正有得醫，呢種等於有一隻眼廢咗，唔聽使呀。」
「喂阿仔，我講緊阿正印，唔係講緊阿後底乸，嗰個嘢對眼原本冇事，仲鬼咁潮氣，聽聞咋，佢不但成日開啲不中不西嘅藥等阿素芳生完女，快啲生番個仔，有一次佢靜靜雞捧住阿男主人個家傳之寶嘅花樽，入去房去到阿素芳後面，詐諦跣低，將成個花樽鋤落去阿正印個頭度，人就暈咗仆喺地，瞓足成個禮拜至醒得番，但以後就三魂就冇咗七魄咁，跟住仲大把古仔添呀，要知阿彭美拉多少部肯講啲寃屈嘢俾阿孝活知嘅……」
「我唔想知……我淨係勸佢搵到自己媽媽緊要啲。」師弟這個聽眾都一直低頭嘆氣：「我哋冇資格挑剔批評人哋，但佢有個『等天收』嘅花名，點會壞事做得少咩，抵佢後來對眼變咗外星人咁，去勻全世界都醫唔番呀。」
晚飯的高潮，是頑皮的代表，都做一個眼珠不受控制，最樣衰的冠軍。個個看官，笑到有幾多隻假牙都見到。