我從來懶理什麼星座斗數三世書，人一躀低，即刻打烊落閘，乜都冇剩。保持靜觀其變的是我的未來老婆瑪莉亞，她在我懶神秘與孝活，前去太子女「棚尾拉」那個神秘酒窖之前，抓緊我的衫袖，「你哎吔家姊，巨蟹座嚟㗎……」
「咁夜你想做神婆同佢睇吓運程呀？」
「冇人有佢咁硬淨，佢好細心好關心好縱容我哋，但佢哋有條厎線，一塌檔就冇得醫㗎啦，你睇吓佢嬲阿師弟俾人呃晒啲錢 ，咁耐都當佢冇到，仲冇睬佢……」
「關我哋咩事？你等我哋去聽阿蓋大班講乜先喇……」
「你家姊點會收唔到風，如果阿蓋大班喺第度有乜三長兩短，佢會唔想做人㗎。」
「個視像通話係指定時間㗎，我哋行啦，你周圍摷吓佢，抱阿ＢＢ去佢房話傾吓佢哋一老一嫩做慈善騷嗰晚點呀，佢一講呢啲就最興奮到收唔到聲，孝活喺架酒店車催啦，我知你錫阿家姊，俾我錫啖先，我好快返嚟。」我好少咁恩愛，暫時止得咳。
事實上，神推鬼㧬，蓋大班肯冒險來個似言不及義，縮膊噴笑，句句後面等於表白，今勻在北歐各地走難，似難逃一劫，和我道別，想我揹起保護疼惜解愁無藥醫的一擔手尾，我報恩無話可說，輸在這些政界鱷魚頭上，我都想食幾啖人肉去洩憤。再見到家姊如常截糊，扣押幫我們大忙的太子女穩坐無燈火的偏廳，愛子句句話裏有話，娘親呆如木雞，猶如想撲出來為蓋世太保擋致命的子彈一樣。
我在酒店車回程中，孝活已用短訊叫我不要通話，她與棚尾拉已說服蓋Auntie，回酒店陪她去頂樓VIP酒吧重開，獨家飲個痛快。我知大家都無句真來落台。我回到酒店房衝入我未來老婆和未來外孫房中，肆意先非禮她，其實放鬆我一晚的魂魄唔齊……「停手呀，阿家姊去咗邊？」
「佢霸咗個頂樓個吧，由得我哋一個二個俾佢隊冧，我實要跟手尾，你唔好去，你要湊ＢＢ起身，犧牲少一個得一個。咁我落去啦，唔係，係要上去，快啲錫我一啖打氣……」
被上頭命令要服侍到天光的酒吧保長，打着呵欠看手機新聞，不用我交帶，他已添兩樽新酒放在只有一個客人的枱上，走夾唔抖，我一步一步上戰場，這個背影毫不似家姊，如果她轉頭過來，我一定要有心理準備，會是日本恐怖片四谷怪談的女鬼現身。幸好把聲無變：「我叫佢兩個走先，我講乜佢哋都唔會明，唔好難為佢哋，換你嚟受罪最好……」我吞啖口水，她著名雙層的銀白假髮，已跣後到額頭頂，隨時落地，幾十年來我都未看到過，她不設防百分百落清光化妝的真樣，「佢唔想我哋擔心啫，佢精過鬼，或者今次啲屎橋，係走鋼線的，佢嚇定我哋先……唔好咁飲法喇，上次你爭啲中風，個底都未清呀……佢返得到嚟，見到你出事，鬧衰我哋呀……」
「你有紋有路，講呢幾句已經好啱聽……得㗎啦……我……我喊得出㗎啦……阿汽水蓋其實好有我心，成日頂完頸，都同我鍊吓條頸……我就乜事都冇……我死十次都冇所謂，佢又冇做陰功事，點解，你話點解……」
「唔好咁……我攬實你返落去，唔好俾啲人撞到，戴番好啲頭髮先……」
「我有乜好怕，我係冇清光啲頭髮呃……唔抵得咩……」兩人捉住雙方像摔角手而去。
瑪莉亞聽到我按開房門密碼，撲出來像見到傷兵回家，一面扭熱毛巾為我醒神，看見几上有老嫩做慈善騷傳單廣告的初稿，「吓？有冇狼死啲？將阿家姊幅相執到三十幾咁……吓，我哋個ＢＢ發晒育咁……扮柯德莉夏萍呀？《Breakfast at Tiffany》 呀？邊個咁冇腦呀，呢壇嘢，等阿家姊瞓醒，心情好啲，我講服佢，你估唔到我咁快搞掂佢咧？」