「今晚仲有幾個視像會議要傾呀，我唔送你哋去機場啦。」家姊這幾個星期死雞撐飯蓋，削骨削肉一樣，我兩父子出遊三兩個禮拜，等於強制她避靜。
「有冇嘢要我帶返嚟呀？」
「有啲搽咗會後生三十年就即管多多都唔拘。嗱，兩封利市仔，坐穩機喇。」說完已把我推出房門， 「我哋唔使攬吓？」「費事俾你抽水呀。」奇怪，人人老了，就有個自動掣，囉囉嗦嗦。包尾的項目，怎也想去「2602」看一下ＢＢ瞓覺的樣子，宋瑪莉亞聞風在房門口攔截，「唔好入去，佢啱啱同隻熊仔傾偈，傾到瞓着咗……」
「乜嘢熊仔？」
「你個Howard囉，我覺得你個仔，都好懂得心理學，臨飛都仲搵時間嚟同ＢＢ玩一陣，買咗隻熊仔嚟𠱁阿ＢＢ，等佢分心。」
「俾我入吓去，我唔會搞醒佢。」一歲大的人仔有好大鼻鼾，我把手指放在脹卜卜的肥手仔下面，她下意識抓緊一下，我當是跟我說拜拜。瑪莉亞不甘冷落，贈我有史以來最認真的嘴對嘴，「你戒咗煙，個人陣味唔同咗……」緊接的幾句話，兩個都在喉嚨說出來，「你想我幾時返嚟？」
「你唔係兩仔爺一做完嘢就返嚟嘅咩？」
「我淨係想聽到，你想我快啲返嚟……」
＊＊＊＊＊＊＊＊＊＊＊＊＊＊＊＊
後生時搭長途機的強項，可以全程昏迷，如今由孝活承繼。破產後大半年來，勤練心如止水，此際掛念每塊人面，七上八落。
奧斯陸話名挪威首都，國際關係了得，逢迎東南西北，與唐人兩岸皆有通商。黨派，學院，博物館，體育場，應有盡有。但在這個大到無倫的OSL機場，行行重行行，孝活定必回復是閒人一個，數三聲竟然有幾個校友來接機，個個笑口噬噬，證明子有人緣，帶挈老竇受惠。登上湖水藍的旅行車，就是租來讓孝活公幹後，父子周遊。接機隊伍在車廂內逼得屁股碰碰，車尾鑽出赫斯基狗的大頭，與前主人交頭接耳，還收到情報，用長脷舐我鬍鬚。各類方言像股票市場，大家天氣報告，孝子作即時傳譯報喜，逐慚夜短日長，升回攝氏零度，可享用這幾日游水比較暖和，我聽到經已心寒。未到目的地已因時差徹底呼呼。
我似電影被綁票的人質疾醒彈起，聞到香口的叉燒味，「乜有咁香叉燒？好近唐人街？」
「好遠㗎，兼好難食，自己用個烤爐搽蜜糖燒，仲加好食……電飯煲有飯……」
「你呢？」
「吉隆坡快過呢度七個鐘，等多陣我同嗰邊電話開會。你食先。」
我本來又麻麻煩煩想話間屋暖氣好焗，立即吞回落五臟，用手機將全屋三百六十度曬冷一次，「嘩……呢度好暖笠笠呀，我哋……ＢＢ妹我哋開會呀，開會有叉燒食呀，阿『烤鑊粥粥』燒㗎，同我錫吓你嫲嫲，錫吓婆波喇。」赫斯基狗回來團聚，眼定定射着我筷子夾到實的叉燒，看來都要愛子及犬，收買狗心，抹去牠嘴角的蜜糖，手指還要讓牠舐乾淨。