其實今晚我可以開車送孝活出城，親眼監察他的演奏斤両，講到尾，幾十年來我任由他的死鬼老母嘈喧巴閉，如今我肯破例，不排除是兩仔爺一項絕唱，我以為他會追問多我一次半次，但他做得出駟馬難追來懲罰我。阿嬸提早煮兩碗和牛麵，竟然也笑吟吟預祝考活演出成功，跟手趕回去湊ＢＢ妺上牀，皆因宋瑪莉亞在尖沙咀落班，直筆去文化中心捧場。看來主角飽受歡迎，我已自作自受，淪為二打六。
這碗麵打背脊落，我含住一啖湯懺悔：「我送你吖，你要定吓神，咁就仲加有水準吖嘛。」
「首本戲嚟㗎，合埋眼都識背……」
「仲有冇多張飛吖？」
「冇啦，你早啲瞓喇，呢兩晚你瞓咗都咳醒，要你坐成晚，咳得多，啲人猛望你，你就嬲㗎啦。」
「我話知佢，咁我送你出去當遊車河喇。」
「唔使啦，對面作曲家嗰對老人家，一早自己買咗飛唔使我請，仲話車埋我出去㖭。」
「夜麻麻，啲老嘢揸車你制唔過呀。」
「你都係啫……哈，唔好咁𥇣實我喇，所以我咪同佢哋講，等我開車囉，你乖乖哋瞓，我返嚟唔嘈醒你，聽朝至同你報告。」
往後的幾粒鐘，罕有沒有探一陣周公，自問自答……幸好在北歐小巷那架大貨車沒有把孝活撞死，那一役翻生，令他變成主動回來還債的……一個難得的好仔……應該佢先至係好老竇，我係嗰個衰仔，我哋洗牌，我還有機會讓他教好我。
沒有哎吔家姊處處為我肉痛，做我命運把守，做突發新聞報告員，我過去幾個月，點會咁得慼。
沒有宋瑪莉亞和大眼ＢＢ妺，提醒我這條死剩種，仍然有一滴責任感。
孝活輕聲入屋時，我拉上眼罩，他安全回來，我有一大堆說話在練習，結果變成催眠，再醒皆因咳個不停，他已是半臥又在看書。
「你有冇搞錯？辛苦咗成晚，唔攰嘅咩？仲睇書？」
「唔關事𠺝，睇書唔辛苦……飲唔飲水呀？」
「我頭先摷晒你啲書出嚟，搵唔返你嗰晚讀俾我聽嗰本『派信佬……』」
「我呢堆書本本都唔係第一次睇，你鍾意咪攞去睇，我扯嗰陣，我留晒俾你。」
「你都知我睇極幾頁就冇句明，要怪怪你阿爺，晨早㧬我去倫敦，乜嘢都係使錢就可以買到，冇咗嘅嘢，以後使幾多錢，都塞唔返入個腦……」
「你有咁講過俾我哋知，你自己唔記得咗之嘛，嗱，有六十幾本書，話人人應該都必讀，就揀嗰啲，晚晚讀俾你聽……」
「書！唔使人哋點我哋，要讀邊啲嘅……」
「啱吖，你點我，定我點你吖？」
「你手呢本喇……」
「呢本係九七年愛爾蘭裔美國退休老師Frank McCourt回憶錄。」
「嗰陣咪香港回歸？係我送扯咗你哋去歐洲？」
「本書由佢自細未成家，移民紐約前勞工生活講起，窮到不得了，但永冇怨天尤人……驚唔驚悶親你？」
「唔驚，我咁老先至窮，都想知吓人哋係點捱過。」
疾醒的時候，應該是聽書聽了好一個段落，說書人已攤直在地上。
有句說話，不能留到明天才講……「你可唔可以，唔好咁快扯呀？」他沒有反應。
過了幾分鐘，孝活總算在喉嚨說：「我知你講乜嘢……」