作為二打六臨牀心理學家，我掛名的診治對象主要是情緒思想或行為上食飽無憂米，尋找困惑痛苦的人。隨着社會世態發展，工作亦霎時間伸展到診斷年紀參差的成長問題，青少年的身心疾病，腦部能力缺損，可能長伴他們一生，不安好心的我，此類生意長做長有。
人夾人緣，與老來嬌的韓娜與卡宦這兩件儷人，我由嗤之以鼻，重新定位，將彼此醫者與病人的關係，榮登到三人行必有我師的地帶。夜尿疾醒時，就湧現他們滯留在首爾不敢離境的畫面，危機重重已累積數周，次次來電報平安，情節扣人心弦，高潮媲美六集英式連續劇。今晚醒得合時，肯定阻擋了竊聽可能的直線電話響起。
「Done with your stooling yet ?」甚少由Carven得到先發聲，用英文報上密碼。
「屙咗。」我立掌握軍情，但那邊並沒有Hanna把電話搶過接棒的必然動作。
「淫醫My Brother，今晚我哋成家人四個，又試死過翻生，落去酒店後山海灘游水，點知有人裝彈弓呀，架快艇突然打橫飛出嚟，開槍嚇到我哋潛落水，原來佢哋係嚟捉走兩隻狗狗，佢哋猛掙扎猛咬佢哋，但係眨吓眼就唔見咗，我哋好鎮定，我有喊，但Hanna冇喊到，我哋向月光誓願，一定要天光之前救番佢哋……」
「咁你老婆點解冇聲冇氣？佢冇事吖嘛？」
「佢今晚同幾個大隻佬開齋，用晒佢未用過啲踢拳，唔係佢哋死就我哋亡，之後佢吞咗三粒安眠藥昏迷住先，你俾我講埋幾驚險，佢扎醒我就冇得講……」
「我記得啦，佢上次話，响地下總部逃走出嚟，嗰兩隻投靠你哋嘅狗狗，可能都係受過訓練嘅特工，詐諦跟你哋返嚟，係有特殊任務嘅……」我也似吞多了安眠藥未清醒過來。
「你唔好咁講喇……佢哋眼精精咁望實我哋兩個，我哋就唔忍心咁懷疑佢哋，Hanna同我，打算好似啲間諜心理戰，去感化佢哋……廣東話係咪有句嘢……二人同心其利斷金嘅？我哋醒起手上面仲有地下總部向海碼頭出口條鎖匙，一二三就飛身潛入嗰度，果然聽到兩隻嘢發啲好掛住我哋嘅聲，黑麻麻跟住啲聲去搵……」
「會唔會再裝個局，等你哋兩個送羊入虎口呀？」
「本來係，但我哋一見到，狗仔就即刻收口，改為一個通知唔好上當嘅眼神……我就即刻俾人用士巴拿仆咗一嘢，阿Hanna醒水，就風車咁起飛腳……講到最緊張，你俾我講埋先……」看來韓娜已轉醒奪回壓軸話語權。
「Doctor Yam，呢度酒店啲西片好鬼好睇，我哋一家人猛睇唔厭，阿Keanu Reeves做個打唔死嗰個『John Wick』呢，第三集同阿黑女Halle Berry拍硬檔，秤住兩隻狗好勇鬥狠嘅一齊出動，最過癮就係佢哋最耍家嘅，係飛撲去噬敵人嘅上三寸下三寸，逢咬必中，倒地呻吟……哈哈……」
「喂，Hanna，你比阿老公講埋你哋點走得甩嗰段高潮先喇，好吊癮呀。」
「我冇講歪呀，原來我哋德國牧羊犬阿大衰仔，真人……真狗不露相，我當時本來佔盡上風，但冇提防後面一把朝鮮日月刀砍下來，千鈞一髮，我睇到邊個動咗真情，火箭咁飛身去用口夾實對方個卵袋，條友啲慘叫到成條地道都震晒，我先至執番條命，一家人由阿拉布拉多細衰仔帶路，走夾唔抖……大衰仔，俾我再錫到你瞓低……」
被搶了鏡頭的老公，同步用手機傳來用水槍嬉戲照片，全無逃過鬼門關的氣氛。