日落太多顏色，情願在泳棚樓梯攤抖，任由正式招認身為外婆的瑪莉亞，搖醒不是自己女兒的外孫，落車向海灘進發。我最怕這種畫面，沉重多過詩意，逛水而去似自尋短見。當然，對大眼ＢＢ來說，人之初，家內有窗等於無窗，見到的是垂直一線天與地，追求夕陽無限好，不知者不罪。剛才逼這位似阿媽多過似阿嫲的女子，用賽後評述的急口令，交代了她們四代婦女興衰史。我仍戒不掉郎心如鐵，都是三幅被，做人你死你賤。
巨宅那邊的哎吔家姊瑪莉亞通緝過我幾次，唯有講一句「我做兩set按摩直落」，這個極度配合我形象的大話，不了了之。這邊的這個瑪莉亞，有個鬆了綁的五官，送這兩婆孫回家後，留我吃她下廚的煲仔飯。大眼妹伺機想又玩櫃頂飛人下降的遊戲，我首次敦起一副嚴父般的黑臉，點穴般指着她的鼻哥，登時生效。在切臘味的外婆像有如得到佛祖出頭打氣：「好囉。你先至治到佢，我被佢撞落嚟額頭笪疤，成嚿瘀血都未退呀。」
我索性在不能伸長腳的梳化合上眼：「我哋就當係啲同場加映啲短片，我好日都冇諗過成日要嚟屯門，你兩個冇遇見我之前，都冇理由就咁攬住過日子……」
「梗係……我實情……同情你，多過同情我自己。」
「呵？乜咁俾面？你信乜教㗎？伊斯蘭？」
「你呢幾年……銀行啲把口唔收嘅人，乜都監我知……」
「有冇講我販賣人口，有條女去到做咗王妃，仲抽時間返香港報答我，搵我瞓返晚呀？」
「呢段漏咗，你得閒同我補習……响銀行……俾嗰個你憎嘅洛仁齊踢咗我出嚟，有幾次我死得咁滯，你都有順手幫過我，但佢哋都話你，未當過錢係一回事，有人見過你喺街邊坐喺石級，同隻狗一齊飲枝汽水，話你癲得好勻循……」
「夠啦阿姐，煲飯要煲幾耐？」
「你撞返我，唔記得我係乜水，我覺得唔值你記，其實怕你唔想我呢啲二打六，知道咁多事發生喺你身上，嗰啲人仲唔放過你，嗰個衰人摸到入嚟知我住响度，話介紹個掛住我嘅印尼客，不如移民過去，都未嬲得切，就想我支付上期益吓佢先……」
「似佢吖……」
「唔係有ＢＢ喺度，我就攞把菜刀出嚟同佢割包皮……」
「咁好睇，下次預埋我。」
「咁衰嘅人都有，所以我唂一聲，留返條後路有仇報仇，乘機話趕住出去叫佢送我順風車，得閒就雙倍報答佢，由屯門出到去尖東，十句有八句都係再唱衰你，所以第時我錯手殺死佢，你應該夾錢幫我請個打得甩嘅律師！」
「你起清晒我啲底，係咁咦都要俾返啲版權費過我喎……」
電飯煲響起飯熟時間咇咇，大眼ＢＢ拍掌仔。我們去得太盡太直接，沒有進一步親熱，食飯比較緊要。