算一算，09年於大馬出道的Gin Lee李幸倪，今年是十五周年了。
這位來自馬來西亞的女子，10年隻身來港追夢，那時候她在網誌寫下，「我就是那位在《超級巨聲2》踢館的李幸倪，我知道今天晚上香港就會播出我踢館的片段……我要說聲謝謝，我就是那位唱《新不了情》的Jeanie李幸倪」，一踢成名，當年的Gin Lee仍叫Jeanie。
訪問中，Gin Lee最常強調的是，每個人都是獨一無二，「所有好與唔好，我失敗與成功，都係我獨一無二經歷，成就今日的我，一路進化嘅李幸倪，蛻變成一個，我希望成為更好嘅自己！」
人生有幾多個十年？Gin Lee說：「每十年都會回望自己呢十年嘅成長，我覺得呢一個path，我做嘅音樂，都係獨一無二！」
有少少被Gin Lee當頭棒喝的一句是，她說：「我發現好多人，都係做緊一啲自己唔鍾意做嘅嘢！」而她，從一而終走唱歌的路，「最緊要你搵到自己價值，自己發光，搵到自己嘅舞台喺邊度！」找到對的舞台，很重要，Gin Lee找到了。
爸爸搶先一步拍電影
Gin Lee在中學時代是名短跑健將，運動員講求堅持，她將以往的訓練應用在歌手的生涯，運動員與歌手，不一樣，又一樣。當初Gin Lee對於運動員與歌手的抉擇，都經過一番掙扎，「當初我去揀音樂呢條路，我都有掙扎過，因為我唔知行音樂呢條路，係咪真係可以出人頭地，我真係唔知道，因為我嗰個時候環境、我身邊朋友，都係揀大家眼中成功嗰條路，我好多同學依家係醫生、會計、engineer、律師、IT等等，大家都覺得一定搵到食嘅工作。我掙扎來自於，我鍾意唱歌啫，但我係咪可以成功㗎？個個人都話自己鍾意唱歌㗎啦，但成功有幾個？我好慶幸呢個時候，反而我爸爸就好好，佢同我講咗一句說話，佢話『你唔好擔心咁多，行行出狀元』，首先要相信自己有呢個talent，個天俾你呢個talent就要好好運用佢。我本身想讀心理學，我同爸爸講，不如我去讀呢科，佢話，『你唔好啦，你根本就係應該要做音樂，你不如去讀音樂啦』，反而佢俾咗一個好大信心我。當時我就話好啦，我用半年時間去讀，如果我真係鍾意先繼續，我讀完之後，又覺得好喜歡，對於我真係想做歌手有好大幫助，我就繼續一路讀完個課程，跟住出道直到依家！」
Gin Lee畢業於馬來西亞國際音樂學院音樂學士，主修聲樂和編曲，由於生於音樂世家，爸爸是樂團團長兼鼓手、母親是大馬的知名秀場女歌手，Gin Lee的表姊是大馬知名歌手符瓊音，Gin Lee自小在家中，已經沉浸在音樂氛圍，18年她的首個紅館騷，就邀請全家上台做嘉賓，爸爸打鼓、姊夫彈bass，媽媽和姐姐唱歌。Gin Lee說：「好慶幸我好細個開始，屋企就充滿住一個音樂氣氛，我好細個已經好鍾意表演，上台唱歌俾親戚朋友聽，日常生活中去訓練我膽量。我當時覺得唱歌好開心，原來表演好開心，所以我去到中學，已經好感受到舞台上面嘅我，我得到一種快樂，我唔似好多人所講，發台瘟呀、好緊張呀、手震呀，點解我冇嘅？我會有少少緊張，但我更享受大家掌聲，好開心大家專心聽我唱歌，嗰一刻開始，我就知道我係鍾意舞台，所以我就揀咗呢一條路。」
最近Gin Lee在IG限動中，放了父親將會主演的電影海報，這套將於下星期於大馬公映的《站在天台上的搖滾男人》，李爸爸有份主演。估不到玩音樂的他，比女兒更早一步去了拍電影，Gin Lee說：「呢套戲，其實係早幾年疫情當中，爸爸有一日同我講『有星探揀中我』，覺得佢好適合演其中一個角色，因為我爸爸係鼓手，導演有一次見到我爸爸打鼓，已經揀中咗我爸爸，佢喺戲裏面都係演一個鼓手角色。當然未上畫，我都未睇，但我聽爸爸講，講一個關於無論咩年紀，你都可以追夢嘅題材，聽落我都覺得好熱血同touching，因為你見到poster就係幾個叔叔，大家玩唔同樂器組band，講返佢哋年輕時候，其實都有夢想，但因為要養家要搵食，將自己夢想擺埋一邊，湊大自己仔女之後，有一日去追求自己夢想。」
經歷不同階段的難
追夢不分年齡，Gin Lee說電影很像爸爸真實寫照，「我覺得某程度上，似我爸爸自己故事，因為爸爸好年輕嘅時候，佢都係鼓手、生咗我同我姊姊之後，因為要養家，要一個更穩定工作，有更好收入先可以俾更好生活同教育我哋，所以佢放棄咗音樂呢條路，去咗做生意，去搵更多錢養大我哋，所以我相信呢一個寫照，都係好多成年人有感受，可能年輕都有曾經想追求嘅夢想，去到某啲時候，你有機會可以再去搵返呢個熱誠。」
當年的Gin Lee，同樣為追夢來港。2010年，隻身由大馬來港參賽，於《超級巨聲2》踢館成名，回想當初的決定，覺得是夢幻還是痛苦？「唔痛苦嘅！我覺得當初隻身來香港，去搵自己舞台嘅時候，其實當時帶點衝動，好多時候追求夢想需要衝動，唔可以諗咁多，諗太多就會開始驚，嗰時我唔識驚，我淨係諗一樣嘢，我依家有機會就要把握，同埋我唔想後悔，我唔想等到我老咗睇返，我明明有一個大好機會喺眼前，但我唔好好把握。我成日都覺得，你成功與否，係你自己去證明俾自己睇！當然我會俾一個時間自己，當時我就話三年，我試吓三年先，如果唔得唔緊要，都係用咗三年時間，至少我證明咗成功或者失敗，跟住三年又三年又三年，我仍然都仲喺呢個跑道上面，我覺得都係一件好幸福嘅事。」
三年又三年，一追也快十五年時光了，Gin Lee由早期的bma至環球再到現在的英皇年代，當時bma轉會至環球期間，曾試過年多時間冇工開，經歷過最低潮的階段，「其實我出道真正嚟講，09年（大馬出道）到依家，十幾年時間，話長唔長、話短唔短，十幾年其實自己都有好多收穫同得着，自己又成長好多，當中有唔同時期所謂低潮，或者唔同程度挑戰，直到呢一刻其實都有，只要你一路去行呢一條路，你每一日遇到嘅困難都唔同，早期因為好多嘢都唔識，會覺得好無助，又唔識人啦、又唔識呢個地方文化，係一種難；當你識咗好多嘢之後，又有另一種難，我依家識喇，但我點樣突破呢？我點樣與時並進呢？呢個又係另一種難，你面對嘅挑戰，唔會因為你上咗軌道就舒服啲！尤其呢個圈要不停update，你唔可以用十年前思維，去面對依家發生嘅事情。十年前做音樂嘅思維，十年後已經唔同咗，你唱法又要有改變喎，所以唔同時期會有唔同嘅難，我覺得最緊要有一個開放思維，去接受新事物，唔好覺得我呢個做法就係最好，唔好keep住一套，我哋要有好多唔同嘅嘢，可以隨時攞出嚟用！」關關難過關關過。
攝影助理：John Yan
花絮攝影：伍敏慧
造型：Amissa Tsui
造型助理：Janice
髮型：Heibie Mok
化妝：Chi Chi
服裝：Ralph Lauren、Dolce Gabbana、SPORTMAX、Ferragamo
首飾：HEART ON FIRE、MESSIKA
