一連三晚的大坑舞火舞盛會，早前於中秋節期間舉行，連日來吸引不少市民及遊客圍觀拍照，人頭湧湧。當中的主角「火龍」由三百幾個猛男「揮舞」，歌手洪助昇（Aiden）亦有參與盛事，更是其中一位舞龍者。
原來這次是Aiden第二次參加舞火龍，第一次已經是在2015年，「相隔咁長時間再玩，自己都好期待，同埋見到依家舞火龍被列入非物質文化遺產，自己好開心去參與呢個盛事。」事隔多年再參與，原來是朋友提議，「佢一直都有參與呢個活動，咁啱今年中秋，佢問我有冇興趣玩返，因為我細個都有舞獅，自己都想pick up返一啲表演唱歌演戲以外嘅另一啲興趣，所以就一齊去報名，好順利去參加今年嘅舞火龍。」
火龍全長67米，一眾舞龍者要揮動火龍遊走大坑，絕對是體力的考驗，所以事前Aiden都密密加操，「因為條龍67米，都唔惹少，要夠耐力同體力，所以自己都準備一下舉啞鈴、跑步，呢啲帶氧運動當然唔少得！」除了體力同耐力，裝備同樣重要，「要戴帽或者攞毛巾包住個頭，因為啲香會辣到頭髮；手套最重要，因為我哋揸住舞火龍嘅木棍舞得耐嘅話，會灼痛嘅！」
Aiden表示這次舞火龍十分開心，因為圍觀的市民都十分熱情，會互相為大家打氣，「嗰一種teamwork精神，我覺得好珍貴！」雖然這次Aiden負責揮動龍身部分，不過他坦言希望有一日成為「龍頭大哥」，「因為龍頭同龍尾，要一啲比較有經驗師兄，先可以handle到，但自己都立志，希望未來可以有機會做龍頭大哥，可以去舞龍頭部分。」