冼靖峰（Archie）在新劇《神耆小子》中，跟鄭則仕（Kent哥）有不少對手戲。昨晚（7日）播出的第二集，二人的棟篤笑式一唱一和，再加入蕭正楠來個舌戰式對壘，均火花十足。
Archie在演戲方面雖然還是新丁，但喜劇節奏意外地好，其中夾在Kent哥與阿蕭之間進行談判的場口，Archie不時以主持式口脗說出「咁你有咩回應？」、「冷靜啲呢位先生」等持平說話；配以阿蕭變化豐富的搞笑式嬲怒表情，及與Kent哥句句有骨的互寸對白，獲網民正評夠搞笑，還大讚Archie以新人來說演繹相當自然。
至於阿蕭與Archie在劇中飾演兩父子亦引發熱議，網民更分為支持派及反對派，支持派認為以阿蕭真實年齡（47歲），絕對能升任飾演Archie（25歲）父親；反對派則普遍認為阿蕭保養得宜，與Archie雖有「父子相」，但感覺似兄弟更勝父子。還有網民發揮創意謂：「會唔會其實係養父？」對劇情後續發展充滿期待。
據知劇集對白之所以如此啜核，除了是編劇功力，亦是主角Kent哥即場爆肚功勞。阿蕭受訪時坦言與Kent哥對戲雖然很好玩，但腦袋絕不能鬆懈，「熟讀劇本係首要，但係腦筋都要轉得快，因為好多對白Kent哥都會用自己嘅方式去演繹，唔一定完全同劇本一樣。加上我同Kent哥劇入面係冤家，好多時大家會度啲啜核嘢去鬧對方同糟質對方，成件事感覺好似邊拍戲邊玩，都好開心。」
另一場Archie與Kent哥咬耳仔討論調查進度的場口亦相當抵死，二人不但連環咬了六轉耳仔，更兩度幾乎「面貼面」，配以Kent哥及Archie一個若無奇事、一個奇尷無比的演繹，相當爆笑。Archie受訪時透露該場拍攝相當難忘：「因為Kent哥想做到一shot落嘅效果，但我第一日唔係好get到應該點演，所以我哋最後都要分shot拍。我哋之後都因為拍唔到想要嘅效果好唔開心，好彩後尾因為under咗有機會俾我哋補拍，我哋真係十分鐘內搞掂咗個一shot落，仲要兩次就搞掂咗。雖然隔咗成三日先再拍，但我哋竟然都冇唔記得對白，呢件事真係好有滿足感。」
