04年港姐亞軍、42歲的朱慧敏（Queenie）與心臟科醫生陳良貴結婚兩年，今年9月宣布造人成功，當時懷孕8個月，預產期為11月。本周三（1日）凌晨，Queenie在社交平台報喜，宣布女兒提早出世，重六磅半。
Queenie接受本刊訪問，透露當日穿羊水一刻緊張又搞笑，這位新手媽媽產前上過很多BB班，懂得冷靜處理，不過就嚇親老公。
女兒比預產期早了兩三個星期出世，Queenie還未佈置好BB房，連嬰兒牀也未搞妥，雖然打亂了她的計劃，但Queenie表示經歷懷胎十月，感受孕育新生命的動人與美妙，她在社交平台寫道︰「你『跨越山海』提前到來，或許是急不及待與我們見面，這大概是你特意安排的驚喜吧！」
其實BB在10月出世，只是Queenie待整頓好才宣布。本周四（2日）Queenie接受本刊訪問，她說︰「我都算係一個好淡定媽媽，其實懷孕期間，我已經看了很多世界各地醫生的分享，知道穿羊水應該點處理。」懷孕期間，Queenie和老公報讀了很多新手父母課程，大概知道如何應對，Queenie說︰「當日老公出咗門口返工，大概早上七時，我都仲未瞓醒，點知突然成張牀濕晒，我知道是穿羊水，不過完全唔痛亦冇流血，但分量就好多，所以緊張了一下，之後慢慢落牀，由睡房行去廁所的路程都一路『漏水』，唔知點解我覺得好好笑，一直行都忍唔住笑。」
之後Queenie打給一位朋友和助產士，先告知他們情況，「我是比較西式，我仲去沖咗個涼，清潔好地方，換了新牀單，再洗埋張舊牀單，慢慢好舒服咁返回牀上休息，之後聯絡助產士告訴他情況，他叫我當冇事發生，睇套開心電影放鬆下，又聽音樂，點了香薰舒緩情緒。」
當日Queenie原本約了好友Vinci王賢誌吃午餐，打算為對方慶祝生日，想不到B女跟Vinci會是同日生日(十月二十日)，「後來另一位朋友上來陪我吃早餐，我們叫了M記外賣，我朋友話人生第一次咁樣食M記，佢仲驚過我，不停催我叫救護車，我話唔好浪費公眾資源，慢慢嚟。」
吃完早餐，助產士通知時間差不多，Queenie便打算落樓坐的士入院，「我朋友話唔得，點都要車我去醫院，我話驚整污漕架車，最後帶定條毛巾和膠袋坐住。去到養和醫院，其實我老公仲未知道，我上到去登記先打俾佢，想給他一個驚喜！我喺電話仲話『陳醫生，我穿咗羊水喇，依家喺你醫院』我老公嚇到口都震埋話『下！你自己嚟？等我睇埋呢個症即刻出嚟』我叫佢放心，之後五個鐘後就順利生咗了！」Queenie表示產前經常幻想女兒的樣子，第一眼跟女兒見面，她已經發現BB性格很喜歡笑，「跟她說話時會笑，輕輕哼旋律的時候她又笑，餵她吃奶的時候又笑，BB甚至連發夢的時候都在笑。」
Queenie的老公陳良貴，是養和心臟科專科名譽顧問醫生，也是香港大學內科學系名譽臨床助理教授，18年曾為Bob林盛斌做「通波仔」手術，事後Bob上載二人合照，Bob形容陳醫生是鑽石王老五「筍盤」，當時曾公開為他徵女友，後來Bob做媒人，介紹二人認識，Queenie和陳醫生拍拖初期，經常相約Vinci一起行山。
Queenie形容與Vinci的關係如哥哥一樣，他亦見證了她整個愛情史，Vinci更加對陳醫生讚不絕口︰「他是一位好叻的醫生，好愛護Queenie！我們出來食飯，他乜都就晒老婆，什麼都以Queenie為先，就算工作真係好忙，都會抽時間陪Queenie上堂，希望BB出世之後，佢可以再抽多啲時間，幫多啲老婆湊B啦！」
