上周MIRROR慶祝成軍五周年，在主題樂園舉行慶祝活動，十二子難得聚首，即將又要為明年一月演唱會作準備。本刊收到讀者爆料指，MIRROR在明年舉行完演唱會後，將逐步減少團體合作，十二子各自主攻單飛為目標，而一手湊大MIRROR的經理人花姐早在7月已向Viu請辭，愛將Anson Lo遂改以私人名義「包起」花姐，專責為自己服務。
十二子人多難免各有「小圈子」，隨住花姐被私有化，原經理人部門再將MIRROR分拆為AB team，更由Anson Lo親自點名，飛起姜濤，兄弟情名存實亡！
MIRROR成軍五年，上周三（1日）在迪士尼樂園舉行包場慶祝活動，今次五周年活動為MIRO（官方歌迷會）會員限定訂購，門票原價$1680，不過出現大滯銷情況，網上曾劈價至半價出售，已令MIRO伸笨，鏡粉更加不滿的，是主辦方Makerville為求「賺快錢」製作了不少紀念品，不過同樣在滯銷情況下，主動割價，如為活動推出的「紀念套裝」，內有紀念T恤及一張官方海報，活動前賣$380，活動翌日即「散貨」，美其名以「MIRO專享快閃價」半價出售。此事被大部分MIRO鬧爆，有粉絲留言：「好心啦，咁急清貨咩，你叫之前正價買嘅人情何以堪。」
當日慶祝活動表面齊心，但其實這一年間，MIRROR十二子各有暗湧，而一手湊大他們的經理人花姐（黃慧君），早在今年7月初已經向公司請辭，交由新入主經理人部門、曾任余文樂與Supper Moment藝人管理的Letitia接手。Letitia履新後成為十二子新經理人，主力貼身照顧姜濤，而姜濤曾在今年個人演唱會中，首度多謝她，而以往多數陪伴在姜濤與Anson Lo身邊的花姐，改為只專責照顧Anson Lo一人。今年7月尾Anson Lo首開個唱，花姐就去足跟足四場，更坐在觀眾席欣賞；反而姜濤的四場個唱，花姐只在尾場現身。
教主親自揀人分隊
花姐在7月初「遞信」後，曾在IG表露心跡，突然有感而發寫下「Look forward with hope, not backwards with regret.（帶着希望向前看，不要帶着遺憾向後看）」，當時大家都以為她是因為MIRROR演唱會意外一年而寫下感言，實情是當時的她已辭職。當時花姐曾為離職傳聞解畫，她回應傳媒時交代：「可能大家見我哋AM team（藝人管理部）有新面孔而有呢個傳聞，我哋希望MIRROR、ERROR有更大發展，所以公司expand AM team！」她更強調：「我仍然係呢個team裏面。」
據知花姐的確獲得「續留」在team裏面，不過是由Anson Lo自掏腰包出錢請花姐，所以自公司AM team改組後，花姐專責Anson Lo的個人演藝事務，有關MIRROR的部分，花姐只會主理演唱會製作，包括明年一月亞博舉行的MIRROR演唱會。對於花姐被Anson Lo私有化，其實早在鏡粉圈子內確認，有鏡粉向本刊透露，「花姐一直最錫係阿姜同AL，不過阿姜太有自己諗法，好清楚自己想點，有時會同花姐唔同意見；反而AL不嬲好識氹花姐，表面又聽教聽話，所以花姐肯淨係湊AL，對大家都唔係一件壞事！雖然阿姜係佢一手一腳捧出嚟又當仔咁錫，但工作嚟講，梗係搵個合作度高嘅仔嚟湊會舒服啲！」鏡粉更透露，姜糖一直對花姐的「粗聲粗氣」頗有微言，「糖唔鍾意花姐對阿姜呼喝，依家Letitia跟阿姜，班糖冇反感，因為Letitia對阿姜講嘢係細細聲好客氣！」
Anson Lo有花姐做專屬經理人，據知在改組後，有人向Anson Lo提議將MIRROR內部分拆成AB team方便照顧，以Anson Lo為首的一team，直接由Anson Lo點名隊員，經教主「點燈」的隊友，五人名單為Edan、Jer、Jeremy、Stanley和Frankie，姜濤竟然被out出局。知情人士透露：「MIRROR有上下弦，內部亦一直都有大仔組（Lokman、AK、Ian、Tiger、Alton、Frankie） 同細仔組（姜濤、AL、Edan、Jer、Jeremy、Stanley），AL同阿姜一直都係細仔組，但AM team改組之後，由AL再揀過，佢將阿姜換咗Frankie！」
據知一直當Anson Lo為好兄弟的姜濤，得知消息後非常傷心。其實，這一年間，兩人的矛盾亦由粉絲間的互相對立，形成大家漸行漸遠局面。今年4月的《西九音樂節》可說是兩人決裂的導火線，當晚是姜濤自傷後的重踏舞台，一連唱跳足30分鐘狀態大勇，不過到Anson Lo壓軸出場時，現場有大批姜糖拉隊離場，據知此舉令Anson Lo事後非常不滿，更將「粉絲行為偶像埋單」怪罪於姜濤頭上，此後亦難再見到兩人同場交流的畫面。對於Anson Lo私有化花姐一事，花姐本周四（9日）以短訊回覆本刊，表示傳聞不實，「Anson Lo請我？我係Makerville員工！依家專心做MIRROR演唱會，所以係負責MIRROR唔係只係Anson Lo！」提到十二子內部分拆，她表示：「同之前回應一樣，我哋增加咗人手，令MIRROR嘅運作更加暢順！」
