張敬軒、李司棋原本「大纜都扯唔埋」，實情二人不時會在對方的社交網留言互動，兩位「網友」因一齊獲任產品代言，終於可以見面。順利完成拍攝的司棋姐自爆只是在扮鎮定：「我好緊張囉，前一晚瞓唔着，幾廿歲人都未試過，因為從來冇見過軒仔真人，我好鍾意佢對眼，一望到佢對眼就唔記得對白，我鍾意咗佢好耐，佢個樣好似我細個睇公仔書裏面嘅白馬王子。」
被司棋姐送上大高帽，軒公亦禮上往來說：「其實我哋喺網上識咗一段長時間，好鍾意睇佢啲帖文，睇佢食嘢特別好味，好欣賞佢著衫嘅穿搭，對生活嘅品味，今日司棋姐仲親手整咗茶燻雞請我食。」
問司棋姐是否見到軒公早餐「無啖好食」，所以親自下煮？她解說：「我見到軒仔朝早要食嗰種早餐，我都試過，有衝動想過去佢度幫手煮幾日早餐，尤其見到軒仔父母唔喺身邊，冇人照顧，加上工作又忙，睇到我好心赤。」
得到司棋姐愛惜，過往經常會同圈中前輩合作的軒公，坦言想邀請司棋姐做MV女主角：「我成日諗，好想有個music video，可以搵司棋姐出演女主角，安排一個劇力萬鈞嘅角色俾佢，但今日見到真人，發覺佢生活同銀幕上係兩個人，反而應該要搵佢做一啲好瘋狂、好多面嘅角色。」在旁的司棋姐受寵若驚，「軒仔叫到我一定會幫手。」
