無綫台慶劇《美麗戰場》開播前，已預告蔣家旻飾演的琪琪被公認為全劇最乞人憎角色，果然由第一集開始，其角色已看得網民咬牙切齒。劇中人稱「反骨琪」的琪琪罪行罄竹難書，貪慕虛榮的她多番離間李靜兒（劉佩玥飾）兄妹及家寶（陳瀅飾）與父親之間的感情，之前又順手牽羊偷走李靜兒亡母鑽石手鐲。
昨晚「偷手鐲」事件曝光，雖然「人贓並獲」，但琪琪死不悔改，更企圖利用傻強（董敬文飾）感情反擊靜兒，幸好傻強終於清醒，怒摑兼爆Seed喪鬧琪琪之餘，又與琪琪母親芳姐（楊卓娜飾）對質。之後芳、琪走出醫院進行升級罵戰，芳姐對琪琪以賊贓作為生日禮物大表不滿，豈料琪琪零悔意兼瞪大對眼連番數落芳姐謂：「貪錢同發姣擺到明你遺傳俾我啦，講到姣？我有排跟你學！」遭親生女反咬的芳姐一怒之下怒摑琪琪，令琪琪憤恨指數再度飆升。
對於「反骨琪」一晚連食兩巴，不少網民坦言大快人心，直指「琪琪先係正宗反派」：「如果增設最厭惡角色獎，佢演到咁有機」、「應該打多幾巴」、「睇完呢兩巴暢快好多」。亦有網民因看到被摑後的琪琪目露凶光，兼在預告中見到琪琪看着傻強被打時露出冷笑，眾人都為傻強安危感擔心。飾演傻強的董敬文入行8年，自2014年起參與不少劇集拍攝，今次飾演傻強獲得不少發揮機會，獲網民指終於捱出頭。
對於角色連續三日遭鬧爆兼人人喊打，家旻（Angel）IG留言兼預告：「今（昨）晚嗰兩巴掌大快人心啦？短短3日，我收到好多Message仲有留言……沒有最賤，只有更賤，聽（今）晚行動升級。」Angel又指琪琪帶給她很大滿足感，並搞笑指葉念琛才是Big Boss：「求求你哋唔好鬧我，要鬧就鬧葉念琛。」。事後Angel補充：「好開心頭三集就有呢個Noise，初初我以為大家要睇到第五集先覺得我好衰，我收到好多留言話：『你衰到我想打爆部電視機』。」Angel又爆葉念琛在劇集開拍前再三叮囑她要與陳瀅、陳曉華及劉佩玥劃清界線：「導演話我唔可以同其他女仔咁Friend，其實我都同佢哋唔會傾到太多偈，因為我每場戲都要用好多能量去鬧人同憎人，要自己匿埋一邊培養情緒。」
