林芊妤（Coffee）的3歲兒子「伯伯」翟德彥活潑好動，精靈可愛的樣子深受網民歡迎。Coffee今日在IG更新囝囝的近況，她表示彥彥因為嘴唇受到細菌感染，而慘變「鴨仔嘴」，她心痛發長文：「BB第一次，紀錄一吓自出世後第一次去醫院。前兩日佢話上唇入面痛，我睇完又見唔到有啲乜嘢只係有少少紅，諗住佢係生飛滋熱氣。噚日個上唇有少少腫以為佢撞到，到瞓覺嘅時候腫到不得了，仲有少少發燒，即刻抱住佢去醫院，驚佢食物敏感怕佢會抖唔到氣。見完醫生話佢係病毒或者有細菌感染，應該本身嘴入面有傷口，然後佢覺得痛係咁用隻手指整個嘴仔，咁一定係啦佢依幾日係咁用手指篤佢，所以就感染到。依家佢變咗一隻鴨仔⋯完全唔認得佢，中咗面目全非拳。」Coffee指今次是彥彥第一次要吃藥，「我都推曬啲會議同工作係屋企陪佢，今次真係陰公鴨鴨，好彩電視能醫百病又能止痛⋯⋯今日放題。」
Coffee更表示自己擔心得發惡夢，「我想講噚晚去醫院既途中好緊張，好怕佢有咩事我唔知點算，即刻諗身體健康真係好緊要架。到半夜睇完醫生返到屋企，我都仲發惡夢，夢到世界末日然後我哋必須揀上船或者係留喺度等死，我哋揀咗好努力咁爬上船，然後一個好大好大嘅巨浪打過嚟，到醒返之後我有咗個新嘅老公，好似有一個新嘅生活咁。但唔知點解姐姐仲係我姐姐，然後BB唔見咗。過咗一段時間普通日子之後，有一日姐姐出咗去買餸，返嚟嘅時候佢突然之間喺門口同我講，你估下我係街市見到邊個!!!!然後我衝出去門口外面，我見到BB穿住啲爛衫企咗喺門口，成身污糟邋遢好似無沖過涼咁，跟住我衝過去攬住佢，佢就係咁喊。」
Coffee醒後餘悸猶存，「其實真係好似拍咗套戲咁呀，到瞓醒我都仲喊緊。所以話未考慮清楚真係唔好生，因為真係好大責任，仲成日搞到自己精神緊張，呢個夢簡直可以用來拍戲呀喂，但我再諗下點解我完全無理我老公去咗邊。」她最後又問網友：「其實係想問吓你哋有冇試過咁嘅情況？通常會幾時先好返㗎？見佢隻牙仔都有少少變黑。」