繼上年聖誕同歌迷一齊過之後，今年聖誕同跨年都有軒公陪！今年中在紅館開完26場廿周年演唱會嘅張敬軒，今晚（20日）喺會展開騷，跨年演出至1月2日開足11場！
好耐冇做過三面台的軒公，開場以白馬王子look出場，與強大陣容舞者一字排開，唱出《Deadlie》夾晒舞，一唱完已經同觀眾講「起身跳下舞好冇呀？」立時全場齊齊un！唱完三首歌，軒公打招呼：「歡迎來到365日第27場！」仲搞笑同觀眾講：「今晚可能一個人嚟，話唔定兩個人走呢？我睇下有冇人啱我啫！」然後認真話：「5月睇完、有啲人話覺得heavy，希望今次開開心心！」講到明今次唱side track歌，仲話有啲歌只會喺首場先會唱，冧死頭場歌迷！
之後軒公由白馬王子look，換上暗黑look登場，衫袖以兩朵大黑玫瑰花造型，唱完《迷失表參道》後，軒公多謝為這身全黑造型設計的本地設計師，然後話自己第一次穿上高踭鞋，仲要足足七吋，「真係要向女同袍致敬！」之後唱出別人的歌，軒公唱出偶像林憶蓮的《傾慕》，而為這首歌編舞、更有份在台上表演的，正是早前MIRROR演唱會綵排受傷舞者Zisac，軒公話今次係Zisac第一次為佢編舞，特別多謝佢！
