胡杏兒四月嘅時候帶埋二仔李奕霖（Ryan）北上開工，三兄弟好耐冇見面，連上個月二仔兩歲生日都唔可以一齊慶祝，但Ryan終於返香港喇。
胡杏兒老公（Philip）今日喺IG upload一連七張兄弟重逢之後嘅合照。相中可以見到Philip抱住Ryan現身嘅時候，大仔Brendan喺車門好興奮咁同細佬「say hi」，之後仲情深擁抱，Brendan更送咗架玩具車畀Ryan，兩兄弟感情十分好。
Philip留言指Ryan終於返香港，係三兄弟相隔接近三個月嘅重逢，兩兄弟一見面笑得好開心，又講笑話Ryan見到屋企所有玩具都覺得係新玩具，屋企亂到好似俾10號風球襲擊咁。不過原來杏兒冇同Ryan一齊返香港，Philip表示一家人都好掛住杏兒。
圖片來源：胡杏兒、李乘德＠Instagram