胡杏兒同李乘德（Philip）喺2015年結婚，胡杏兒今年4月生完細仔李奕宏（Liam）之後就帶埋二仔李奕霖（Ryan）一齊北上開工，老公李乘德（Philip) 就留低照顧兩個囝囝。但近日Philip竟然惹嚟「食軟飯」疑雲？
李乘德胡杏兒
胡杏兒北上工作後，老公Philip就喺香港負責照顧囝囝，更經常喺IG share湊仔生活照。噚日Philip趁落雨帶囝囝出街玩，晒囝囝生活相，相中見到囝囝們都玩得好開心。唔少網民都大讚Philip落雨都肯帶囝囝出街玩係好爸爸，但竟然惹嚟「軟飯王」嘅指控，有網友喺post下面留言指Philip係「世紀軟飯王」，犀利過袁偉豪，佢話Philip日日喺度湊仔玩樂，老婆就生仔前後都要喺大陸辛苦拍戲，更認為胡杏兒慘過生仔機器，又要生又要為生活拼搏，質問Philip間酒吧去咗邊。
李乘德兒子
Philip則大方回應呢位網民，佢表示自己用心做嘢做咗幾十年，而家有幾間公司，托賴今年生意唔錯，可以俾到少少時間自己陪小朋友。佢又認為家庭同小朋友係最重要，希望嗰位網民會明白，對於網民關心嘅酒吧仲喺唔喺度，佢就答︰「得閒落去飲杯嘢，我請。」
李乘德胡杏兒
唔少網民大讚Philip EQ高，胡杏兒亦有留言力撐老公，為老公抱不平，指老公多年嚟一直努力工作，養家糊口，直到今時今日已經成功建立咗自己嘅事業，澄清老公經營嘅事業穩定，先令佢有更多嘅時間陪屋企人。
圖片來源︰胡杏兒、李乘德@Instagram
