由爾冬陞監製、麥啟光執導兼編劇、陳偉斌編劇，郭富城、林家棟、任賢齊及張可頤主演的賀歲電影《臨時劫案》，上映一星期多，口碑不俗，除故事笑中有淚，拋開天王包袱來個哨牙造型的城城，當中「講多謝」同「Sorry 」對白已成為潮語金句。
影片的導演兼編劇麥啟光，在杜琪峯多部電影包括《奪命金》、《毒戰》和《盲探》中擔任過執行導演，杜導亦已捧徒弟場，事後特別拍短片說：「啱啱睇咗麥啟光、阿斌（陳偉斌）、阿澄（萬芫澄），三個人搞嘅片，我覺得算係咁啦……要討論就好多地方嘅！但最少一樣嘢係，本年度香港賀歲片，我諗呢部算係最好睇。」
戲中飾演「笠水」的家棟與老死「冇用輝」小齊一場對手戲，劇情交代二人同被綑綁雙手雙腳，被困在的士又黑又擠迫的車尾廂中，二人咫尺距離，家棟仲要伸手猛摷小齊的褲袋尋找手機求救，小齊回想：「車廂好細，逼到大家嘅呼吸都感覺到，導演仲想有我哋有曖昧感，要我用口幫家棟撕走喺口嘅大力膠布，同家棟口水都交換到，佢隻手又亂摷，我忍唔住叫咗下唔好，拍完一晚感覺全身都散晒。」
