有一段時間沒有出現熒光幕的何遠東（阿東），終於再有新劇《異空感應》播出；剛過了四十歲生日的阿東，感觸地說：「我開始覺得要對自己好啲。」
阿東演過不少「入屋」角色，《降魔的》司機龍貓、《心理追兇》飾演弒母肥仔一角更令他人氣急升，成為該年「民選最佳男配角」，隨着恩師前無綫監製王心慰（Amy）榮休，本身不是「親生仔」的阿東亦被投閒置散，無奈步入「雪櫃」，在生日當日，他決定與無綫結束十六年賓主關係，「大騷劇集綜藝我乜都試過，最後連『雪櫃』都試埋，其實對一個演員來講，我覺得都算好完整嘅。」
入行十六年，何遠東從沒放棄過影響他一生的舞台劇，除了演員身份，還一直兼職教小朋友話劇，亦慶幸成為他收入的主要來源，「的確係好耐冇拍劇，冇拍劇嘅時候，我都要生活，好彩我仲有能力可以去教書，同埋我亦都好有耐性，出入得最多就係中小學，佢哋有時都會問我『咦，阿Sir，你唔使開工拍戲咁得閒咩？』我只好答，因為我真係鍾意演戲囉。」
冇試過入監製房「敲門」
阿東和細細粒陳嘉佳，曾經是無綫的鎮台肥孖寶，細細粒一早已選擇離巢發展，阿東另外兩位好友黃智雯及唐詩詠亦先後宣布離開，阿東說：「以前比較重戲嘅角色，其實來來去去都係兩、三位監製（用我），我諗因為都有難度，監製搵你，係！佢好想用你，覺得角色啱你，都會想同你度身訂造，寫多兩句、寫多條線，會同你傾，做演員其實會好開心，但係慢慢就冇喇，總之你收劇本啦，都唔緊要，起碼我知仲有監製搵我，其實我估佢哋花咗好大能力，要用好多力先可以說服到公司，麻煩你用何遠東啦，希望大家批准。」
問阿東有沒有試過入監製房「敲門」？他說：「講真，一間公司運作我好明白，捧緊呢幾個，梗係要推晒佢哋出嚟先啦，做咩要益你？你有啲咩可以俾返我呀？咁耐以嚟，我都幾有骨氣，我真係冇敲過門，唯一一次就係同Amy姐講，我話如果你最後一套劇，我就算幫你路過掃街，我都要拍。」新劇《異空感應》是前無綫監製王心慰榮休之作，阿東一早表明無論多少戲分、甚麼角色都願意接拍，「以前冇佢扶持我，我都冇咁多演出機會，佢喺無綫已經關照咗我十幾年。」
今年九月廿四日是阿東四十歲生日，他與好友到台灣慶生，一早就收到公司電話，以為是祝賀生日快樂，「我仲好開心喺度holiday，朝早收到WhatsApp，話係時候要傾下，同我傾合約問題，其實我好surprise佢哋唔記得我生日，anyway啦，只係叫你留低，冇再講其他嘢，跟住我都苦惱咗一陣，其實我係咪應該繼續留低呢？因為我強項係演戲，我諗觀眾認識我，都係因為我嘅角色，因為編劇監製導演拍得我好好，但係依家好似冇得發揮我嘅優點，一個演員唔俾佢演戲，你擺佢喺度其實佢冇用㗎，佢唔會識得發光，自己又大一歲，不如試下啦，我真係即刻覆佢㗎，佢問考慮成點？我就同佢講，我個考慮係我唔考慮喇，跟住就打電話嚟，傾咗一個好長嘅電話，我都好慶幸嗰一刻自己冇動搖，證明我都真係受夠，係人都知『雪櫃』好凍啦，咁你唔走入去，你冇試過又點知呢？我喺間公司入面，我其實咩都試過，以一個唔係『親生仔』，我一直都係part time約，但part time約係唔可以接拍其他嘢㗎，頒獎禮試過、台慶騷試過、大騷劇集綜藝乜都試過，最後連『雪櫃』都試埋，所以對於一個演員嚟講，我覺得都算好完整嘅。」
問阿東的生日願望，他說：「我開始覺得要對自己好啲啦，對自己好啲，有好多方面嘅，一來對自己身體好啲啦，仲要對自己個心好啲，因為我都幾耳仔軟，只要人哋對我有好少少，我都會死心塌地幫你做十樣嘢，我之前從來冇諗過我會離開呢間公司，一路以嚟，我都覺得我真係可以做過世㗎，我就係一個咁嘅人，只要你嗰個地方，係俾到溫暖同安全感我，其實我真係可以喺度好耐，點解要走？都可能少咗啲溫暖，少咁啲安全感，好似都係時候，賴死都冇用。」
六個字最hard feeling
效力無綫十六年，如何形容這段賓主關係？阿東自嘲似一名工人姐姐，「我係一個工人姐姐對住Mom咁樣，Mom叫我做咩，我都會『Yes,Mom』，就算佢幾挑剔，我都會自己改進，或者我都好想入到呢間屋，但到頭來，即係十六年過去，最終都覺得未入到呢個屋企，可能始終我哋係有僱傭合約關係，哈哈！即係我好努力，到頭來反問你點解做得咁多？做得咁好？唔通我要做得唔好咩？你問我咁多年來有冇啲咩job真係唔想做？真係冇，就算到依家有人話你係一隻飛行棋，講真我當年真係覺得冇問題，可能太單純啦，反而最憎玩game嗰啲忌廉，塞晒落眼耳口鼻頭髮，好難洗呀！」
令阿東最有hard feeling，不是安排他出演甚麼丑角，而是六個字，「有六個字真係好乞人憎，亦都傳返入我耳仔，就係『你太好、你太多』，咁我諗大家都明啦，你想我點呢？依家呢一句說話，彷彿變咗我人生座右銘，我會記住自己要恰如其分，就算近年拍戲都好，做丑角，一定要令到個主角發光發亮，有啲嘢唔係你嘅，千祈唔好同爭人，如果話我刻意去搶fo？其實努力去演好一個角色，我唔覺得係錯，我控制唔到觀眾媒體鍾唔鍾意你？如果觀眾鐘意你，佢哋就會留言，就會有討論，咁唔係一件好事咩？」
訪問最後，阿東嘆了一口氣，如釋重負地說：「我終於可以講我係自由身啦，過往我都多謝公司啦，因為公司令到『何遠東』更多人認識，因為我以前只係一個舞台劇演員，這十六年其實多咗好多觀眾認識我，亦都會有好多唔同機會，但係未來就係自由身嘛，唔使再有任何束縛，我都希望可以參與唔同節目，我有好多嘢都未試過，例如如果喺第二度拍電視劇又會點呢？就算電影都好，之前拍過兩齣，打戲又試過文戲又試過，究竟仲有冇其他電影可以？我想繼續挑戰自己，希望大家仲想睇我。」
場地︰Casamigos
