由兒童節目《Think Big天地》教小朋友跳舞，到被監製梅小青欽點，在劇集《宮心計2深宮計》飾演「陳茗風」一角開始，終受外界注目的林子超（Andy），入行12年不斷挑戰新嘗試，最為人知是參加《全城一叮》化身「變妝皇后」又跳又唱，驚艷全場，最終更奪得冠軍。
今年Andy又有新搞作，自資12萬出歌做獨立歌手，雖然分分鐘血本無歸，但能夠成就解鎖事業另一階段，Andy希望新歌可以啟發別人，勇於接受自己。
以獨立歌手身份推出第一首單曲《廢人美學》，Andy的處男MV絕不馬虎，性感舞蹈加上40吋爆肌巨胸，令人睇到嘩嘩聲。Andy解釋歌名的意思：「廢人美學其實想講緊一個生活態度，早幾年好多人都躺平生活，我發覺其實『躺平』好多人會定義為負面，但我覺得用第二個睇法，可能係一件好事，耍廢未必係浪費時間，做幕前一定有好多唔同高低起伏，我哋耍廢時候，可能係一個養精蓄銳準備，又唔係做傷害到人嘅事，有咩問題？」新歌籌備了一年時間，主因要操fit個body，「呢一年，我一個禮拜做五日gym㗎，又要節食，我啲朋友問我點解成日都要減肥，相就話可以執，拍MV真係冇得執。」
近年參演不少無綫劇如《宮心計2深宮計》、《法證先鋒》系列與《逆天奇案》系列等，Andy每次的角色都十分有話題，招牌笑容又有觀眾緣，今次突然轉型推出一首性感跳舞歌，Andy解釋演員身份應該多變，亦希望觀眾看到他的另一面，「其實點解突然有歌手呢個身份出現呢？我本身已經有兩個身份，一個是演員、同埋教小朋友跳舞老師，教跳舞時候，我做一個好陽光嘅Andy哥哥，演員就用自己經歷，或者感受去代入唔同角色，但我愈來愈覺得，人應該有多面嘅，尤其經過疫情之後，我不斷去問自己究竟『林子超』係一個點嘅人？究竟我有幾多面？我希望可以透過音樂，去表達另一面自己出嚟，或者有啲young generation可以認識到我，音樂可以將自己比較野性和性感一面去同大家分享，個MV大家睇完的確嘩一聲，但因為我小時候已經受美國音樂文化影響，好想知道咁擺落去一個亞洲歌手，仲要係新人嘅玩法又work唔work呢？」
Andy小時候因先天性心漏病曾放棄跳舞，讀演藝學院時還要做開心臟手術，之後十年，Andy一直以為已經遠離跳舞，今次以歌手身份出道，以跳舞快歌作為頭炮，亦寓意重拾舞者夢，「依家身體應該都冇乜問題，因為近年做gym都做到幾hardcore，一年會返去見醫生一次，所以都穩定嘅。」開胸手術令Andy的胸口，有一道手術造成長達8吋的疤痕，他曾因此有自卑感而失去信心，「初初比較介意，甚至去沙灘游水都會用化妝品遮住，但依家家發覺要學習同自己好好溝通，愈來愈接受自己了。」
做歌手的想法，Andy坦言亦是受到創作歌手Serrini的啟發，「佢啲歌詞好大膽去唱出自己想法，由佢早期到依家嘅歌都有聽，每首歌都好有感覺，亦都好inspire到我！今時今日究竟做一個藝人應該點做？同時又點樣去做一個真正嘅自己？因為佢嘅歌，令我覺得每個人都係特別嘅，同埋要將自己大膽一面勇敢展現，繼而去啟發別人，呢啲先係做歌手真正意義。」
獨立歌手連盤數都要自己計，本來打算用6萬蚊budget造一首歌，結果最後埋單竟花了12萬，「拍MV嘅dancers由兩個變四個，出嚟效果差好遠，又有好多唔同造型，有造型又要多啲場景配合，係有啲貪心，使大咗，所以依家好窮。」
去年Andy成功「上車」做業主，每月又要供樓，他坦言現在的確有點入不敷支，「因為我係一個唔可以停落嚟嘅人，入伙差唔多一年，見供樓都幾穩定喎，有啲錢淨，不如用嚟造歌囉，老實講，係開始有少少入不敷支，所以我都要俾心機工作喇！」
化妝︰Daniel Ng@The Flawless Drea
髮型︰Louis Lam@Private I
