草蜢剛於周六（19日）在澳門站舉行巡迴演唱會，3小時無間斷又跳又唱，台下觀眾反應熱烈，令草蜢的演出更加落力，當中蔡一傑狀態大勇，在台上表演後空翻，獲全場掌聲，但直到演唱會接近尾聲，傑仔在台上才道出他是負傷上陣。
傑仔說：「前一晚綵排跳舞唔小心拗傷左腳，夜晚返到酒店房，阿智（蔡一智）仲話做鐵打師傅幫我扭吓隻腳，我即刻話唔好，唔慣俾阿哥捽腳，但我有幫自己按摩，其實今晚現場太好氣氛，我根本都忘記咗受傷，因為觀眾嘅掌聲同歡呼聲，係最好嘅止痛藥。」旁邊的蘇志威說：「其實我好放心佢嘅傷勢，因為我哋3個都係超級運動員，少少損傷，一日應該可以復原，今晚大家都有眼睇，冇問題。」
成軍38年，傑仔在台上感觸說：「一個歌手喺樂壇38年已經唔容易，一隊組合喺樂壇38年，除咗大家要一直維繫住好好嘅關係，大家仲要一樣咁fit，先可以做到今時今日，所以呢條路一啲都唔容易行，當年我哋第一首主打歌係《飛躍千個夢》。」
阿智接着說：「草蜢到依家，應該達成咗500幾個夢左右，仲有好多夢可以繼續實踐，希望大家將來喺任何媒體上見到我哋，會諗起香港有一隊3人組合叫做草蜢。」
澳門站演出超額完成，傑仔這晚還有另一個好消息，原來他獲《香港健美金像獎2023十大健美名人頒獎典禮》頒發「十大健美名人獎」，還有一座999.9千足純金獎座及獎牌，他希望可以繼續保持到某個年紀，仍可以有6嚿腹肌。
