長時間在報館工作，有些陋習積習難改，好似出街見人，爛身爛勢就踩入人家波場，一切話之佢。最唔好係嗰啲主人家，見到呢班衣衫不整嘅傳媒入嚟，一定阿哥、阿姐咁奉承，慌死服侍得你哋唔夠周到，個個明星、導演、製作人四萬咁口歡迎你，識做嘅仲會塞紅封助長歪風。玩埋嘅老記，得閒時會聚賭，大家都知道各自都係打緊三幾百文工，但係輸起錢上嚟人人都會不斷見紅。六十年代一張紅底好巴閉㗎，啲大哥一輸到可以見紅十次八次面不改容，出血見紅談笑間，三個月人工之嘛，輸得起。哈，哈，小弟就係响咁嘅環境下面被潛移默化。
六七年開始，電視台風起雲湧，天上星星都集中在電視台，跑電視台記者個個笑逐顏開，識做嘅星媽也大演功架，識做的記者也分享到成功的果實。電視台記者也一改從前記者的形象，變得企理端莊，恰似荷李活電影裏記者的形態。死鬼阿杜都由記者變成宣傳大員穿起獵裝背心了。從事電影宣傳工作，一般人都很隨便，只有一個人衣衫永遠執正，就是林檎檎叔，從恤衫、領呔到西裝皮鞋都是合度配襯，雍容大方絕對配合身份與形象，極具說服能力。
死鬼老友黃霑最愛隨便，只可惜他的工作往往需要大袍大甲地著西裝、打領呔，對佢嚟講實在係苦事，老實講著西裝打領呔真係唔係好舒服，箍住條頸鬼咁唔聚財，仲有西裝為咗好睇，膊頭裝塊墊，心口車到挺直，佢話好似孭件龜殼响身度，後來佢老友鄧生搞上海灘，先知道中式服裝嘅舒適，只可惜能享受的時光唔係好長。