今時今日黃子華棟篤笑門券炒到飛起，其實呢個世界日日都响度上演棟篤笑，黃子華鋒頭呢一陣俾金仔金正恩搶咗少少，話香港人唔關心政治啫，好似金仔呢種癲人，真係癲起上嚟，香港都唔會好過。嘩，佢惡起上嚟真係惡到冇人有，飛彈亂咁射，點知佢幾時射出個大頭佛嚟㗎？點知鏡頭一轉，又同你玩祥和，同文在寅响三八線互踩，攬頭攬髻一番。呢個世界舞台上嘅超級演員，勁過川劇變面唔知幾多。玩到癲佬特朗普都呆晒，唔知應該點應對，個叻仔識得點樣牽住你個鼻走，唔怕你癲，唔怕你呆，最怕你唔上台。
你話南北韓會唔會統一？做場戲你睇就得，睇你哋鯁唔鯁得落啦。最最起碼嘅條件梗係由朝鮮勞動黨領導全國各政黨聯合執政，金正恩任期並冇限制，為咗國家需要，必須盡忠於人民，以畢生嘅精力不辭勞苦為人民服務。南韓北韓本來就係朝鮮半島嘅一個國家，只係响政治上邊俾人一分為二，所以國名應該叫番做朝鮮。韓劇好睇，又為國家賺好多錢，北方美女都唔少，可以為韓劇注入強大嘅元素，當然唔會日日講革命啦。另外呢，文在寅應該醒少少，千祈唔好同金仔稱兄道弟，有眼你睇㗎，要記住金仔大佬係點死先至得㗎。
搞政治嘅人必須保持絕對敏感，嗰個人對住你咿起棚牙，千祈唔好以為人哋好友善，多數都係想食你邊忽，好似特朗普忽然懶好人，就要保持高度警惕啦。而家連印度佬都竟然扮佛祖，你估真係牀頭打交牀尾和咩，大家玩吓嘢，睇吓邊個章法高囉。