草蜢的蔡一智日前（3日）60歲生日，一眾好友張智霖與袁詠儀（靚靚）、古天樂、容祖兒、蔡卓妍（阿Sa）、關智斌、古巨基、周汶錡、周勵淇盛裝出席阿智「登六」派對外，阿智昨日（5日）在社交網上載片段，由發哥率一眾跑友一起給阿智唱生日歌，唱完英文又唱廣東話版本。阿智留言：「多謝發哥（周潤發）和一班跑友為我預備的生日驚喜 #慶生跑 #新年第一跑15k #跑完食大餐 #還有生日蛋糕 #真的慶生飽 #這個生日真的發發發」。
阿Sa分享派對照並詳述跟阿智的緣份，是在她6歲的時候：「嗰陣時我老竇正職係一個設計師，副業就幫一間娛樂公司負責香港歌手海外登台，我第一次見到明星就係草蜢同彭羚，因為太細個，所以好多片段都唔記得喇。」
阿Sa表示時間一轉去到Twins首個演唱會：「我哋嗰陣時出道唔夠一年，公司就幫我哋開演唱會，夾夾埋埋得六隻歌，咁公司就諗住搵啲勁嘅前輩歌手，幫我哋撐場，其中一個就係草蜢，我諗住佢哋都唔會記得我啦，點知喺Rehearsal嘅時候，一嚟到見到我媽咪，就即刻同我媽咪打招呼話好耐冇見，嘩！過咁耐佢都仲記得，我媽咪即刻冧咗。得人恩果千年記，見過幾次面咋，個人真係好好呀！」
