薛家燕、林敏驄、棟篤笑演員Vivek Mahbubani作客今晚（5日）一集《Mayanne小喇叭》節目，主題是「喜劇人生」。之前家燕姐已因搞錯連詩雅與衛詩雅講錯「恭喜」大派笑彈，節目中，家燕姐再爆出陳年烏龍搞笑事，當時被認錯的人竟是林子祥。家燕姐笑言：「有一次，我請咗個Superstar，我介紹佢出場時話：『掌聲歡迎阿Sam』，我講完就哈哈哈（邊說邊做出拍手動作）。個Superstar出嚟嘅時候就話，我叫阿Lam（邊說邊哈哈大笑），林子祥呀！我即刻哎吔，瘀晒喇，咁就全場笑到不得了。」
除了烏龍事，家燕姐還分享了當年拍攝電影《食神》時的珍貴花絮，並指是被星爺啟發喜感：「其實我唔知自己有喜感，直到星爺搵我拍《食神》，我問佢攞劇本攞咗個零兩個禮拜都未有，到（拍）嗰日我就話：『星仔呀！你有冇劇本呀？』佢就話：『家燕姐，我想問吓你，你係咪好鍾意跳舞㗎？』我就話係，六、七十年代嗰時。佢就話：『喂！跳嚟睇吓』，我咪跳幾吓咯，跟住佢就叫我等等，裝完幾部機再話：『嗱！你由呢度跳去嗰度，盡量發揮你嘅跳舞』，嗰part舞就係咁跳出嚟，跳到我自己嗌cut，佢唔嗌cut，同埋冇音樂㗎喎，佢搵個茶杯同筷子喺度敲。」節目中還播放了當年家燕姐與王祖藍及曾志偉的經典「潘今年」、「潘舊年」及「潘明年」扮相，由於王祖藍全程忍俊不禁，結果效果比志偉更爆笑，家燕姐還會拆解當年三人雙眼黐膠紙之謎！
至於林敏驄更難得一本正經大談喜劇演員之路，及與好拍檔曾志偉昔日合作點滴。
