張頴康與鄧佩儀正為無綫新劇《換命真相》開工，有報道指鄧佩儀因為首次擔正女一，感到很大壓力，拍攝時不停NG，令張頴康忍不住在片場發火。張頴康看過報道後，昨晚在IG發文，回應「著火事件」，表示近日有不少工作人員與服裝部姐姐都問他事件始末，「你發火咩？」、「係幾時嘅事？我想睇呀！」、「乜原來你識發火？」、「我睇住你訓練班出嚟咁多年，你都唔會發火嘅。」他更立即「表演」發火，「嗱！鄧佩儀，如果你以後咁少時間瞓覺都早到現場，我發火爆你㗎！如果以後你NG少過我，我即刻發火爆你㗎！」
「表演」過後，他正式回應：「其實，我哋合作咗都係得十日八日，大家都仲係磨合緊，何來會有不和呢！不如俾啲空間我哋啦，我哋都係想盡力做好個戲俾大家睇啫！請各位高抬貴手，放過我哋啦！」因為回應得有曖昧感覺，似是緋聞多於不和，他笑言：「死火啦！講到好似我哋有路咁樣添！不過算啦，我老婆唔會誤會就得啦！」
圖片來源：張頴康、鄧佩儀@Instagram