憑劇集《大叔的愛》「入屋」的練美娟，最近在新劇《反起跑線聯盟》和ERROR梁業扮演搞笑父母，帶動劇集氣氛兼做反面教材，表現相當搶鏡。
練美娟被網民稱為娟姐，是ViuTV的開荒牛，五年前正式入行，性格爽朗的她直言Never too late，坦言有夢就要去追，如果重新再揀，亦會選擇二十七歲「高齡」才入行。
現在做藝人，除了做好幕前演出，亦要懂得與網民互動，練美娟不時會上網睇留言，她說：「大家寫給我的留言，我全部都會睇，好壞都會睇，咁先夠全面，做得好要知、做得唔好都要知，有時網民是用不同的方法給你建議，大部分都係話我老，個樣唔似三十幾，似四十幾囉，仲有把聲好嘈，我咪試吓講嘢唔好咁高音、慢啲改善一下。」網民給練美娟很多稱號，例如「一姐」、「娟姐」，不過她對「娟姐」有點抗拒，「我鍾意大家叫我阿娟，連燦哥（潘燦良）都叫我娟姐好驚囉！其實娟娟、阿娟、娟妹、娟BB都得，娟姐真係唔好再叫喇，叫老晒！」練美娟外表似玩玩吓，其實她亦有認真一面，「上年年中做了聲帶手術，切了兩粒瘜肉，現在這把聲清脆好多，因為自己也有主持工作，發聲好重要，現在學習養聲。」
練美娟大學時修讀傳理系，畢業後做過電影公司的Marketing、廣告公司的PR，圍繞的都是有關娛樂圈的行業，「ViuTV開台，他們需要一些新面孔，監製Tommy輕輕問了我一句，突然之間，好似喚醒了自己曾經都有這個夢和興趣，當時的工作亦遇到樽頸位，做下去都未必有好成績，入行好講機會，不是填張表格，藝人好多際遇，遇到機會就要好好捉住。」直至簽約一刻，娟妹才識驚，「做藝人沒有保證有底薪，好似做保險咁，有就有、冇就冇，當時一直有穩定收入，的確有啲驚，覺得自己任性，博囉，博一個機會，壓力梗係有，要交租、要養寵物、又要扮靚，我又鍾意食嘢。」二十七歲入行算不算高齡？「都冇話遲嘅，never too late，活到老學到老，我嫲嫲都識玩WhatsApp啦！我遲入行算什麼？如果可以再揀，我都想在這個年紀，加上未入行前的職業都跟這一行有關，明白工作流程，做完幕後再做幕前都有好處。」
《大叔的愛》是練美娟第一次拍劇，傻大姐的角色很受歡迎；在新劇《反起跑線聯盟》亦把市井師奶演得入型入格，她笑言：「初時知道要做阿媽都怯㗎，返屋企觀察吓自己阿媽，所以『羅太』真係有阿媽的影子，說話時會拍吓對方的手臂。」戲中跟ERROR梁業飾演夫妻，她笑言要揀老公一定揀潘燦良，「拍完這套劇真係深深愛上他，他是一位好好的前輩，人又friendly，每次問他演戲，他都有方法教你，經驗好豐富，最重要是他很願意分享。」
練美娟說慶幸自己沒有經驗便拍劇，「正正因為沒有經驗，壓力冇咁大，放鬆去做比較手到拿來，之後便會陸續有作品推出，到時便會有壓力，現在好好享受角色，每個角色的故事，觀眾看得出嘅，現在的觀眾好叻。」不過，最叻是劇中的小演員，「我戲入面的兒子真的是一位演員，拍過好多廣告，我跟肥仔要問他望鏡頭位置，每次roll機他又會問清楚？睇到佢都算係定心丸，我只要做好自己就得。」
場地：Pier 1929