諸葛紫岐〈Marie〉和薛嘉麟的兒子韜韜不經不覺已經兩歲多，向來甚少露面的韜韜，獲爸爸首肯分享了兩條短片，片中韜韜好滋味咁食緊朱古力，另一條片就是Marie在商場追住個仔玩，韜韜同爸爸成個餅印，睇佢都非常斯文，不過Marie就話阿仔令佢非常頭痕，韜韜凡事都愛跟她討價還價。
Marie說：「佢而家會同我講條件，好似我叫佢做啲嘢，佢會話咁我一陣要食一件蛋糕或兩粒朱古力，佢想睇youtube，我話不如你睇十分鐘，佢就會話不如睇十二分鐘，我話十一分鐘啦！佢會話不如十二分鐘啦！我哋兩個會bargain呢啲嘢，係好搞笑，佢想去遊樂場玩，我話不如玩十五分鐘，佢話不如十八分鐘啦！之後我話十六分鐘，佢話不如中間十七分鐘。」
其實韜韜識得為自己爭取的性格，都係Marie遺傳，事關Marie自從開始做生意後，為了旗下藝人也會討價還價，她說：「今年公司的新人ReX會出道，Winkie（黎美言）會拍電影，我自己都好忙，經常四圍飛，在香港的時間比較少，因為現在開始發展金融方面的生意，不過嚟緊韜韜放暑假，我和老公都預咗時間同佢去旅行。」
圖片來源：mariezhuge@Instagram