由香港國際電影節協會主辦、文創產業發展處贊助的巡迴影展「光影浪潮 – 香港電影新動力 2024」，剛在福岡舉行，COLLAR成員Sumling李芯駖代表主演電影《望月》到當地宣傳，同場還有《武替道》導演Herbert梁冠舜及《贖夢》演員Brian李凱賢。
首次撇低COLLAR成員，獨自出埠的Sumling，坦言今趟旅程難免有點孤寂感，但她仍感恩有今次機會，「覺得同日本好有緣份，之前好多工作都喺日本發生，不過今次非常緊張，好擔心唔識同日本觀眾溝通，慶幸有位非常好嘅翻譯，其實我出發前都有嘗試學一兩句日文，嚟同日本觀眾打招呼。」平時一大班姊妹在身邊，好似之前到日本拍《idc》MV，今次孤身一人，她惟有上網update吓，睇班姊妹做緊咩，仲買咗好多手信畀她們。
還有一個多月，就是一年一度的樂壇成績表頒發時節，今年單飛出歌的Sumling，對於新人獎可有盼望？Sumling指：「反而係平常心，因為出作品，我係好享受過程，好喜歡整個作品由零開始，去到誕生，箇中經歷係好開心，呢個亦係令我想做更加多作品嘅動力，所以重點係作品，對獎項未有太大盼望。」去年好姊妹Marf邱彥筒成為女新人，對此，Sumling可有壓力？她說：「上年Marf成為女新人，好戥佢開心，好proud of佢。我又冇壓力喎，無論喺團或solo都有好多作品，獎項如果有係錦上添花。」未知可會邀請媽媽出席頒獎禮？Sumling笑言媽媽年紀大，留在家中舒舒服服看電視好過。
