唐詩詠飾演的Q姨，在昨晚（23日）播出的無綫劇集《超能使者》，被患腦退化症的阿鏈母親（程可為飾）誤當做新抱，阿鏈（陳展鵬飾）惟有「將計就計」與Q姨扮夫妻，氹老人家開心。未料，阿鏈又不慎喝下媽咪煲的「有料糖水」，搞到全身㷫烚烚，更對Q姨蠢蠢欲動，誤會被阿鏈暗戀的Q姨竟主動獻吻兼表白，結果再遭阿鏈請食檸檬，場面搞笑。
另邊廂，Open姐（劉穎鏇Tiffany飾）與高勇（陳山聰飾）終於上演冧爆kiss戲，其中兩人被困在冰櫃一幕，Open姐更撒嬌大講疊字：「抱抱……攬實啲！凍凍呀！」攻陷一眾男粉絲心。對此，Tiffany受訪時自認私下較男仔頭，故從沒講過疊字：「我未試過咁樣對人撒嬌，所以拍攝時都有少少尷尬同怕醜。」問到跟山聰拍吻戲時會否尷尬？Tiffany坦言兩人多次合作已變熟絡，故今次拍kiss戲也不尷尬，事前亦𡁻定香口膠作準備。她說：「佢真係好似一個哥哥咁，令我好放心同信任佢，感覺仲幾得意添。」
今晚（24日）一集，「Q鏈」和「O勇」兩對CP的戀情，將再有突破性進展，惟Q姨的異能後遺症卻愈趨嚴重，同時瑞琦與威仔陷入被追殺危機！