「升中自行分配學位」，今年有新猷，正取生將於四月收到學校電話，有新手家長聽到消息不知如何是好，忙走來要我同佢解釋新安排的特點。以下為我們傾談內容，子女今年參加升中自行分配的家長宜細讀，免到重要時刻「倒瀉籮蟹」，誤了大事。
趙為本人 家為家長
家：請問今年正取生幾月幾日會接到通知？我家長又應點樣回應？
趙：今年四月七日「正取生」會收到學校的電話和書面通知，這個電話通知的目的，是俾家長知道有一間佢申請官津中學取錄佢個子女，唔需要統一派位再填表揀學校了。
家：如果我申請兩間中學，兩間都考到，是否當日會接到兩個電話？咁我是否要立即揀讀其中一間？
趙：接到電話，只須留心聽，記低中學名，講聲「多謝通知」便可以了，完全唔使做決定，因為至七月七日結果公布，你先知道派邊一間俾你個仔的！
家：咁，如果個仔有申請直資中學，亦已俾間直資中學取錄並確認個學位，而於四月七日我又收到官津中學收我個仔電話，我是否可以「兩全其美」，開學先決定讀邊一間？
趙：唔得！你四月十六日之前，一定要決定讀一間。如果你決定個仔讀官津，就日之前，去收你個仔間直資中學，返《家長承諾書》同埋《小六學生資料表》的正本。
家：如果我想個仔讀直資又點做？
趙：讀直資就簡單，你乜都唔使做。教育局自然取消你個仔個官津學位！
家：我想問問，派位過程，一定有學生揀讀直資而放棄佢官津學位，咁我可否放棄派俾我個仔學位，而去間學校「叩門」？
趙：「叩門」應該統一派位之後進行，教育局唔准中學自行分配學位呢個階段「叩門」的，因為「大局未定」，中段將學位轉來轉去，會難以控制，故此禁止「叩門」。
家：我又想問多條，我雖然接受個官津學位，又想試報統一派位，因為統一派位有更多選擇，可否再報多次？
趙：答案係唔可以，因為指引規定每個合資格適齡兒童，只會獲派中一學位一次。你既然接受了自行分配個學位，就唔可以再申請統一派位，此其一。其二為，就算你放棄自行分配個學位，都唔可以申請統一派位，因為你個仔已經獲派中一學位一次，永遠唔會獲派第二次。
家：咁即係要我家長唔好三心兩意，如果唔係，個仔連書都冇得讀。
趙：咁又唔係，「九年強迫免費教育」下，你個仔一定有書讀，不過冇權揀想讀一間！
家：明白。多謝趙Sir詳細解答，令我茅塞頓開！