有一位對香港小一入學制度極具興趣的朋友，走來和我討論這個制度的優點和缺點，以及提出一些改善方法。以下為我們討論的內容，有興趣的朋友不妨細心閱讀。
趙為本人
朋為對小一入學制度有興趣的朋友
朋：趙sir，其實，目前香港用緊呢個小一入學制度，由哪一年開始？
趙：2021年小一入學報告書，稱小一入學統籌辦法，由1983年9月開始一路用到89年才「修訂計分辦法準則」，然後到97年經檢討維持不變，無驚無險到2004 / 05學年，經諮詢教育統籌會及聽取有關界別意見之後，於2005 / 06學年採用現行小一入學機制。
朋：05前與05後的小一入學機制有何不同？
趙：我聽過小一校長，05年前小學校長有酌情權分數，即係話校長喜歡某個申請者，可以俾十分酌情分佢，但05年之後便取消了。這樣收生便比較客觀及公平公開、及公正。
朋：客觀及公平、公開、公正；可否詳細解釋？
趙：05年之前，校長可以給喜歡的學生一個酌情權分數，這便是用主觀收生。05年之後，用「世襲」、「計分」及「隨機編號」就比較客觀，例如「世襲」，家長要在心儀小學任職嘅子女才可以必入，兄姊在心儀小學就讀，弟妹亦屬必入；全都是有根有據的；計分也是一樣；家長在心儀小學畢業子女就有十分，你讀過但無畢業證書便無十分，這便是客觀。「隨機編號」就更加公平、公正、公開，因教育局係用電腦來gem個編號出來嘅。
朋：不過，我作為家長，便覺得目前嘅機制，「好睇唔好食」；例如自行分配世襲同計分，全都是foregone conclusion，（事前肯定的結論），例如你曾經讀過邊間小學會影響個仔有十分，是一切大局已定，家長可以替子女做嘅地方，其實少之又少；唔通你喺「自行分配」階段叫家長，為子女轉工？叫仔女領洗？至於統一派位，唔通你叫家長做「遊牧民族」，為子女搬來搬去，就算你肯，電腦也可以亂派，你試想，將一個質素高嘅學生派去一間質素低嘅學校，將一個質素低嘅學生派去一間質素高嘅學校這樣做正確嗎？公平公正應該係資源嘅分配，唔係人才嘅亂配。我認為人才嘅錯配係對家長、不公對社會不利。
趙：咁樣講，唔通你主張用面試來甄別學生的高低，如果是，豈不是又加了主觀成分？家長會不滿的。用筆試，家長一定會反對，因為要一個七歲的小朋友考筆試一定增加小朋友嘅壓力，家長又會話教育局虐待學生了。
家：咁，你認為目前嘅制度係完美無瑕？
趙：當然不是。人設立嘅制度很難完美無瑕的，但我哋可以盡力而為，做到最好。舉例，在一間學生質素差異大嘅學校，可以喺頭嗰兩年設法將學生嘅中英兩科語文教番好；例如可以分班而教，亦都可以用小班教學，亦可以用雙班主任制或者用各式各樣嘅課外活動來提升學生中英文能力，例如可以晨早集體閱讀，鼓勵同學參加中英文朗誦，甚至做微型嘅話劇，總之，在小一小二將所有學生嘅語文水平提升到可以喺聽說讀寫都達到不錯程度，咁呢間學校就算踏出成功嘅第一步！
家：那麼第二第三部又如何？
趙：總之搞好咗中英文兩科嘅語文，其他科目便容易辦了，所以目前嘅小一入學方法也有存在價值的。
家：我則認為是沒有辦法中之辦法！
趙：亦可以這樣說！