小一統一派位結果，會於明天（六月六日）公布，有家長於放榜前走來，問我應否去「叩門」，及如果去，要作什麼準備，以下為我給他的「忠告」。
趙為本人 家為家長
家：趙Sir，如果個仔派唔到心儀小學，應否去「叩門」？
趙：點解你咁問，是否覺得去「叩門」有失尊嚴？
家：係呀，要求人個學位，咁大個人，未試過！
趙：其實，從另一個角度來睇，You are doing the headmaster a service（你係幫緊佢），你去「叩門」，使佢有種「校長」感覺。你唔去叩門，小一收生整個過程，從「自行分配」到「統一派位」，身為小學校長，完全冇校長「feel」！
家：你意思是整個小一收生過程，都是由教育局負責，所有「世襲」、「計分」以及「大抽獎」，都係由小學的書記及教育局負責。校長好聽就係不用操心，唔好聽就係冇權收自己喜歡學生？
趙：正是，呢個情況直至「叩門」，小學校長先至回復返校長應有權力—收自己喜愛的學生，亦即是說，家長是「造王者」the king maker。
家：係咩，如果係，我就唔使「驚」去「叩門」啦！趙Sir，你是否誇張？做緊棟篤笑？
趙：實情如此，絕無誇張！家長可以放心去「叩門」，唔使尷尬！
家：明白，請問趙Sir，叩門前要做什麼準備？
趙：首先，要上網查一查心儀小學在網頁有冇公布「小一候補生學位申請須知」，或者「小一特別收生須知」，又或者「小一叩門學額申請須知」，如果有，便應細讀內容，因該「須知」一定會公布遞交表格日期，連同表格必須遞交的文件。
家：我正想問要遞交什麼文件？
趙：文件包括「叩門信」、學生「近照」、「學生的出生證明書」副本、「小一註冊證」副本、「自行分配學位」及「統一派位」小一入學申請表之家長副本、幼稚園高班（K3）上學期「學業成績表」等。
家：明白，趙Sir，是否要交個portfolio（學習經歷）？
趙：如果小朋友有些特別的表現，你想校長知道，例如在幼稚園唱歌比賽取得冠軍或和媽媽幫助某慈善機構賣旗，便可以在portfolio放上圖片，讓校長知道，因為做得好，「一畫勝千言」（a picture worth a thousand words），可能加分的。
家：原來如此。最後一條問題，是否網上冇公布「小一叩門須知」的學校便一定不收叩門生？
趙：未必，據我所知，有冇公布的小學，只要家長放低的「叩門信」及「文件」，學校一樣會睇。如發覺適合，一樣會電話通知申請人來面試，只不過因為叩門位太少，唔想鼓勵家長去申請。
家：即係話，就算冇公布「須知」，一樣照樣申請？
趙：照樣申請，除了「申請信」同「文件」，you have nothing to lose（你無任何損失），所以值得一博！
家：多謝趙Sir指點！