由韓國風靡至全球的「MBTI十六型人格測試」，從林家謙Terence的歌曲，樂迷一致選為他是「i人」（Introversion內向）的代表。
「i人」通常都是超級社恐，陳奕迅早前在澳門演唱會首唱《社交恐懼癌》時，笑說作曲的林家謙、寫詞的李榮浩都是「i型人」，Eason更形容這首歌是「梁朝偉去看樂團My Little Airport演出」，鼓勵大家勇於面對恐懼。
早在十年前，林家謙已經唱出「i人」心聲，《一人之境》兜兜轉轉，去過不少歌手的手中，但最後仍然由他親自唱出這首「i人主題曲」。
《一人之境》是林家謙的成名作，這首歌的demo在十年前已經出現，「十年前已經有呢個旋律，係自己一個好早期寫嘅demo，之後一直流到唔少歌手嘅手中，但係最後又唔知點解，就好似冥冥中注定咗，好似個天要首歌『hold住先』，每每都有啲阻滯，始終都未有歌手用到首歌。」這一行都有個說法，與人一樣，歌有歌的命，家謙說︰「我記得去過Janice(衛蘭)度，我覺得佢唱應該好好聽㗎，之後又去過一些台灣歌手，有好幾個，最後又不了了之，直到我出歌，就決定自己唱返，份詞係二○年先填，係囉，緣份就係咁，最後竟然係自己唱。」
韓國天后IU（李知恩）五月來港開騷時，亦選唱了林家謙的《一人之境》，IU在台上表示這歌很難唱，但很好聽，而且歌詞很有意思，非常適合像她這種「i人」演繹。家謙說︰「聽到IU唱覺得好不可思議，佢好用心，唔單止翻唱，仲去細讀成首歌嘅意思，因為首歌係講緊『i人』，好似講緊佢自己嘅性格，所以由佢唱出嚟好有感染力，我知佢本身有一個歌list揀，最後揀呢首歌未必關我事，應該係個主題吸引到佢。」
跟Eason的緣起
這首歌，其實第一位聽demo的是陳奕迅，《一人之境》亦把家謙和Eason的緣份拉起。
當時家謙仍未入行，是任職婚禮琴師的時期，「呢件事真係鼓起咗我畢生嘅勇氣，發生喺一六年，我已經畢咗業，因為知道Eason會嚟母校做分享，跟住就返咗去聽talk，我準備咗一個有八首demo嘅iPod，《一人之境》係入面其中一首，聽完talk之後，我諗咗好耐，用咗好大嘅勇氣將個iPod遞俾佢，佢pass咗俾個助手，跟住就沒有下文，最後佢係一首都冇聽過，只係擺喺牀頭櫃入面。」
家謙續說︰「隔咗一年左右，竟然收到Eason喺IG嘅回覆，當時我仲未有藍剔，佢應該係特登搵我個名，個message話佢仲未聽到，係因為個iPod太舊款，冇插頭充電，但叫我放心，個iPod仲喺佢度好safely。」
一個小小的舉動，改變了家謙的人生，去年Eason的個人專輯《CHIN UP!》，全碟八首歌找來家謙包辦作曲，「嗰段時間可能疫情，大家都唔係太多嘢可以做到，得閒咗就大家一齊寫吓歌，Eason叫我有乜demo就分享吓，咁就幫佢做咗整個專輯；而家諗返住轉頭，都冇諗過自己當時的一個舉動會變成咁，其實當時自己又覺得，入面啲歌都應該唔難聽，可能佢都會有機會用嘅，但係冇諗過，入面一隻歌都冇用，但事隔幾年，又用咗另外嘅八隻歌出碟，所以係一個神奇嘅緣份。」
Eason碟內的歌曲《社交恐懼癌》，亦令家謙首次入圍第35屆金曲獎「最佳單曲製作人獎」，家謙說︰「應該唔會出席了（本周六），真係有社交恐懼，第一次入圍都有啲意外，同埋我覺得真係全靠陳生carry，我諗冇佢個名，呢首歌未必會去到各大評審嘅耳朵，所以係托佢嘅鴻福，宣布嗰日都好興奮，興奮咗大半日左右，過咗第二日就過咗去，冇再點諗有乜期望和結果，其實做完隻碟、做完啲歌，最大嗰個得着就係有機會同Eason一齊做音樂，整個過程都好不可思議，已經賺咗好多，同埋我自己好知足，所以到時無論結果有定冇，唔係覺得太重要。」
「i人」永遠只看眼前的事物，甚少回望過去的自己，近年是頒獎禮常客的家謙，每次得獎的反應都很平淡，「有時都覺得自己係咪有啲問題，對獎項嘅喜悅不是十分大，嗰刻跟住之後過咗就過咗，好似冇乜點樣去好enjoy過個moment，我性格就係咁，可能係ISFP其中一個特性，好focus現在，唔會特別諗之前嘅嘢，又唔會諗好長遠嘅嘢，呢一刻我開心，過咗就係第二個moment，就會去諗第二個moment發生嘅嘢，我好少會眷戀住過去。」
獎座放在家中角落
由入行至今的獎項，家謙都有好好保存，「獎放晒喺家中某個角落，我都冇乜點特別檢視嗰啲獎，如果要問我邊個特別有意義？應該係作曲人獎，本業上獲得嘅獎係最開心嘅，歌手嘅獎都開心，不過有時覺得係有少少僥倖，我一直都覺得歌手上的認可，未輪到我咁快得到，自己知自己咩事啦，我唔係大家會認可唱功上好勁嘅人，所以喺唱歌上面嘅獎項，我睇得淡，我唔會覺得需要有啲咩認可，你唔認可我都OK，因為我真係未到嘛，作曲上，我覺得自己作嘅歌係幾好聽喎，獲獎開心同埋合理囉。」
家謙最近推出第四張專輯，亦把自己的人格測試植入，新專輯《ISFP》解作「I人之境」、「S人之感」、「F人之緒」及「P人之變」。
家謙說其中一首歌《有你聽我的故事》是總括了「ISFP」人格的感受，他解釋︰「一種渴望被聆聽，儘管我覺得『ISFP』嘅人平時大部分傾向摺埋，好收埋自己，但其實都希望有聆聽自己心聲嘅耳朵，無論係比較close嘅朋友、樂迷又好、或者唔認識嘅人都好，我都希望大家有共鳴，儘管自己可能同呢個世界有啲距離，無論咩型格，其實大家都有啲相同嘅地方。我身邊比較多圈外嘅朋友，我覺得相處會舒服啲，唔知點解，就好似返工都唔會鍾意跟同事hang out啩？我諗我收工會想同屋企人食飯，唔會係同事，識咗好多年嘅朋友，我就會傾，唔會話好多，但又唔缺囉，依家覺得好足夠。」
「當我透明得㗎喇」
新專輯家謙亦希望為「i人」平反，「有好多人以為『i人』唔鍾意講嘢或者點點點，我覺得大家有少少誤解咗，只係一種心態取向，或者自己最舒服狀態，另一個『i人』李榮浩都有『e人』嘅一面，例如佢做節目做show大家就會見到，只係工作以外，想歸於平凡嘅自己，我哋都係偏向呢一種。」《社交恐懼癌》其中一句歌詞「不要遞我眼神試圖邀請我加入」，就是家謙的心聲，「係呀，千祈唔好望到我，唔使理我，當我透明得㗎喇，尤其是多人嘅地方，有時唔想傾偈，『i人』就係咁。」
封面攝影︰Alexander Yeung
封面攝影協力︰Gwen
花絮攝影︰洪志富
形象︰Nana Wong、Anthony Tong
造型協力︰Music Ho、Ingrid Ma、Kelly Janice
化妝︰Dera Tse
髮型︰Cedric Tsang
服飾︰LOUIS VUITTON、PRADA、LOEWE、CHRISTOPHER RAXXY、CHAUMET、BVLGARI、Tiffany & Co.、GENTLE MONSTER FROM PUYI OPTICAL
