跳舞街收爐初二再啟市 陳慧嫻休息3日養傷

陳慧嫻40週年演唱會，昨晚完成第五場，應節收爐三日，初二再啟市。
昨晚慧嫻請來ERROR任嘉賓，舞台上搞笑謂剩係想同肥仔講嘢，因為肥仔同佢差唔多高，終於可以用水平線對望，其他三個就由得佢，免自己不停向上望得多會頸痛。
講笑過後，她先是多謝ERROR ，邀請她加入年青人隊伍，「可能有好多人唔知我同ERROR係乜嘢關係呢？ ERROR佢哋最近有一隻新歌，有一日唔知點解邀請我去做佢哋呢個MV入面客串嘅一個角色。」ERROR肥仔話，「其實我哋個個都識你㗎…同埋我哋ERROR呢有個古怪嘅心願，我哋專搵啲靚姐姐合作，你唔係客串咁簡單呀，你係女主角呀。」

ERROR又謂，慧嫻的跳舞街係經典，本來他們的新歌是希望可以向《跳舞街》致敬，mix埋跳舞街音樂落去，但係最後因為版權問題實現唔到，所以點都要搵慧嫻拍MV crossover他們的《野舞士》。

完成第五場之後，慧嫻就可以收爐三日，年初二再啟市，昨晚她騷後接受傳媒訪問，「今晚係龍年最後一場，我揀唱《去吧》都係因為咁，龍年去吧，有咩開心唔開心都要放下，一齊開開心心迎接新一年！」收爐三日，慧嫻表示主要是休息瞓覺，另外會用六位數字去封利市，準備初二尾場派比所有台前葛後工作人員。另外因為頭場華麗跌親，其實膝頭哥係有瘀，幸好不是大礙，亦襯這三天休息可以好好散瘀。初二真正完成尾場後，她才會真正跟家人聚會拜年及慶祝新年。新一年會唔會想搵個男朋友，慧嫻謂，「我都咁大年紀啦。唔會再強求了。我好幸福，身邊有好多好朋友，屋企人陪伴嘛。咁其實我又唔會話抗距嘅，如果生命真的緣份上有安排，先去諗去接受囉。」