16年簽約黎明旗下A Music的JC陳詠桐，曾參賽《中國好聲音》，其出道作《說散就散》在YouTube累積過億點擊，剛剛完成入行8年的首個演唱會後，JC宣布轉行做唱歌老師，正式離開娛樂圈。
現年25歲的JC，卸下歌手和「J女郎」光環，不過她感恩與黎明的緣份，亦因為這個歌手經歷，令她接觸佛法，JC說︰「如果唔係，我嘅生活一定係一塌糊塗！」
黎明曾經打造過不少「J女郎」，如Janice衛蘭、JM文詠珊、Jill衛詩、JW王灝兒，還有JC陳詠桐。JC出道時，刻意不曝光樣貌便派歌，一首《說散就散》令她一曲成名。
入行8年，JC甚少出席公開活動，宣傳訪問更加少之又少，她直言︰「的確唔享受做幕前，你見我做個訪問都扭扭擰擰，又唔鍾意影相就知。其實我一早就發現自己唔適合做呢一行！」決定轉行，JC有沒有跟黎明解釋？她說︰「都唔需要解釋甚麼，完咗就完囉！佢知道，但冇乜advice，最唔適娛樂圈甚麼？可能有好多我唔理解嘅嘢，唔理解點解佢哋會認為咁樣做係work，然後要我配合，做完又好唔comfortable，又唔係好work咁囉！」最近JC亦有新歌數碼上架，她則解釋這首新歌《日光》，其實是A Music的「倉底貨」，「以前嘅倉底貨，我完約之後就冇再錄歌喇，依家正式轉行。」
問JC有沒有後悔過入行？她說︰「冇呀，正如我在演唱會所講，人生行過嘅每一步，都成就依家嘅自己，返唔到去十年前！如果我冇簽嗰張合約又會點呢？我睇唔到㗎嘛，冇辦法肯定冇簽會唔會好啲，可能呢個就係我最好嘅結果。這份話長唔長、話短唔短嘅合約，我又覺得冇失去到任何嘢！冇乜損失，人生就係咁，有幾多就注定咗！」
JC於16歲就認識黎明，在這十年間，JC在天王身上學了甚麼？「可以咁講，通過同佢呢段經歷，我接觸咗佛法，如果冇同佢呢個經歷，我唔會接觸到，我唔係宣揚任何宗教意識，呢個係一個好客觀嘅事實，一定係因為呢段經歷，我先會信佛。如果人生冇迂迴曲折，我係唔會信佛嘅，我都好感激、好感恩我有呢個緣份；如果唔係，我嘅生活一定係一塌糊塗，當我有迷失或者睇唔開嘅時候，有方法去梳理自己思緒。」
如今正式轉行，卸下「J女郎」光環教唱歌，JC決心做回普通人，「我依家嘅生活，其實同一般人一樣，教唱歌搵兩餐，係正職嚟㗎，日日都要開工，比以前做歌手更加full schedule。」JC說，現在跟她學唱歌的學生，甚麼人都有，「小朋友又有、大朋友又有，有冇啲學生好似以前嘅我？好慶幸冇呀，點解？因為我好難教㗎，但有好多天賦型選手，我覺得好勁呀依家啲小朋友，食咩大嘅呢？哈哈！」
問到以過來人身份，有甚麼跟想入行的學生分享？JC說：「冇㗎，等你做到過來人就明，我講咩都冇用！我話唔好入行，唔通你又真係唔入行咩？你先係自己嘅指揮，有啲咩都係要自己去經歷。」
這段時間，JC坦言都有其他唱片公司向她招手，不過她十分享受做唱歌老師，現職的音樂學院老闆，正是她入行的伯樂伍樂城。JC曾經創作過不少hit歌，如《一語道破》、《我該放手》與《分手100天》等，之後會否繼續創作音樂？JC說︰「睇吓緣份，有心情就會寫到，鍾意嘅就會寫吓囉！會唔會自己唱？世事冇又絕對，可能自己做到首歌好聽，自己錄完放上網都OK！」