林子博去年8月底帶同一對仔女移居英國曼城，子博今日（10日）在社交網貼出一張快速檢測捧呈陽性的照片 ，他發文表示不幸確診新冠肺炎，「妖～中咗！冇咳、冇鼻水、冇喉嚨痛、有味覺、唞氣正常。連續三日燒到39、發冷同周身骨痛！」
子博又將其YouTube頻道談及確診經過：「1月7號夜晚，發覺自己有啲唔舒服，沾寒沾凍、發燒，周身唔聚財，感覺到自己作感冒。當晚已經入房瞓，但半夜起身好辛苦，就食咗啲All In One感冒藥同埋探熱，當時體溫係38度幾，咁就做快速檢測，當時未有嘢，就冇再理，覺得係普通傷風感冒。」
直到英國時間1月9日，跟子博的朋友認為他持續幾天發燒，應該是確診：「原因係我第一日做嘅檢測，身體含菌量唔係好高，出嚟結果唔係好準確，就叫我再做多次。當我再做一次，出嚟嘅結果就係…中咗﹗呢度有兩條線，『T字線』仲係好深色，我朋友話係我身體最多菌嘅時候，有中咗嘅朋友話我聽，過多10日8日，會睇到T字線逐漸淺色。當然唔開心啦，我中咗，第一時間叫仔女在家戴口罩，自己亦戴口罩。」
子博稱過去3日持續發燒，最高去到39度，身體不停發冷，「今日就37度幾，算叫做好啲，發燒沒之前誇張，暫時病徵冇喉嚨痛，有少少咳同鼻水，味覺係正常，希望係普遍嘅Omicron，而家冇辦法，惟有自我隔離。呢度唔同香港，呢度係要喺屋企自我隔離，咁我就可以睇住仔女，但我都擔心佢哋中招，唔知嚟緊佢哋會唔會發病，冇人知，希望唔會啦﹗」
子博表示現時要自我隔離，「我自己一間房，阿仔阿女一間房，咁樣先真正隔離，如果惹埋畀阿仔就麻煩。」他又指囝囝防疫意識強，暫時仔女都沒有病徵。
子博回憶染疫前曾到過的地方：「我諗番起過去10日8日去過邊、做過乜、見過乜嘢人，第一時間打番畀佢哋，問佢哋有無中？」他稱甚少外出，更沒與朋友開Party，平時除了揸車時沒戴口罩外，其餘的時間皆全程戴口罩，子博表示最有可能係超市，「有時啲包裝唔知有冇菌，一係就仔女喺學校惹返嚟，羣體聚集只係學校，佢哋一上車而我喺車內冇戴口罩，係咪因為咁而中呢？我真係唔知，我覺得好大機會。」子博又感謝友人和老闆的熱心幫助，助他度過難關。
圖片來源：林子博@Facebook、YouTube
