鄭秀文（Sammi）昨晚（13日）在紅館舉行第二場「You & Mi 鄭秀文世界巡迴演唱會2023」（Rescheduled），邀請林家謙擔任表演嘉賓，手牽手邊走邊唱《親密關係》，全場起哄！
Sammi在第二場演出換了新裝，以「白色小飛鳥」造型歡迎表演嘉賓林家謙出場。她笑問家謙歲數後以「表弟」作稱呼，然後二人在台上即以「表姊」和「表弟」相稱。Sammi對家謙說：「呢個演唱會原本喺舊年舉行，嗰時邀請你，好快就答應做我嘉賓。其實我今年再搵嘉賓都好驚，因為邀請咗人哋之後自己撻咗Q，人哋預晒時間，我內心好抱歉。今次再膽粗粗搵林家謙，點知又一口答應，真係好多謝你！」Sammi還即場邀歌，家謙亦一口答應，她興奮地說：「你應承咗㗎啦，哈哈，我公器私用！」
家謙之後為Sammi送上小禮物，他說：「其實唔係好貴重嘅嘢，出邊應該未入到貨，我喺Pop up店買冇貨，呢個我上網買，係一個《Inside Out》（電影《玩轉腦朋友》）嘅盲盒。」Sammi開心說：「多謝，我最近首歌叫《盲盒》呀！」家謙又說：「我覺得啱你首歌，同埋『盲盒』呢個意思好好，我哋每人每一日瞓醒嘅都好似抽盲盒，因為遇到嘅事情、情緒都預計唔到，無論抽阿樂、阿怒、阿尷都好，都希望你好好擁抱每種『腦朋友』。每種情緒都可以令我哋感覺到自己嘅存在，然後好好咁過每一日。」Sammi即大讚：「講得好，多謝表弟！」
家謙原本請Sammi返後台拆盲盒後才告訴他抽到什麼，豈料她爽快即場拆，還將包裝紙丟到地上，家謙則連忙拾起，看得觀眾大笑起來。結果揭曉Sammi抽到紅色「阿燥」，家謙笑說：「啱晒你啦，你頭先咁樣！」他接着模仿Sammi丟垃圾紙到地上。Sammi馬上變乖，「好，我收斂，好好控制自己嘅情緒。」家謙說：「收埋佢，唔好爆出嚟！」家謙還吩咐她把包裝紙垃圾帶返後台才棄置。之後，家謙出唱Sammi的經典金曲《衝動點唱》，還改了一句歌詞變成「原來是我衝動翻唱」，獲全場歡呼回應。
Sammi在Encore時送上《盲盒》、《如果我們不再見》和《我們都是這樣長大的》，她說：「嚟到第二場，一切緊張和拘謹都拋開晒，多謝你哋入場。」她笑指觀眾隨着年紀漸長，大喊「encore」和「Sammi」的聲音都變弱了，提醒觀眾要多做運動，還展示手臂結實的「老鼠仔」，得敕地說：「睇唔出我就嚟52歲？犀利？應承我，一齊變老，好唔好？」全場觀眾大叫「好」！
