郭嘉駿35歲生日前夕外公離世　發長文嘆遺憾：要愛得及時

193昨日生日前，迎來公公離世噩耗。

男團ERROR成員193郭嘉駿昨日（14日）35歲生日，他在社交網貼上兒時與公公婆婆的合照，發長文講述與外公過去的點滴後，他說：「公公尋晚終於過咗身，但今日係我生日，以前每年生日都會收到公公畀我嘅生日利市，突然發覺原來以後都冇機會再收到。呢幾日係我腦海不停徘徊住呢四個字，愛得及時」。

193自小由公公婆婆湊大。

193表示小時候因父母要返工，有段很長時間都是外公外婆湊他。過往他覺得公公很犀利，那個年紀仍身體健康及腦筋靈活，但近一兩年身體狀況突然急轉直下，很久未能吃到公公親手煮的美食。「六年前我入咗行，公公會睇我做嘅節目劇集會睇我嘅報道，我開始覺得終於可以令佢安心令佢自豪，就算遇到咩唔開心咩挫折，佢問起我都會話冇事所有嘢都好順利唔使擔心，直到真係賺到錢想請佢去旅行，先發覺佢身體條件已經唔許可」。

193遺憾說：「有時做嘢好忙又有好多事要兼顧，可能忽略咗佢，搬咗屋想帶佢上嚟睇，買咗新車想帶佢兜風，開咗新餐廳想帶佢去食，一直覺得仲有大把時間唔使急住做，但原來所有嘢都要愛得及時。有時會責怪自己唔夠叻，如果我叻啲就可以喺頒獎台上面多謝佢，但原來時間係唔等人。佢前兩日望住我話多謝我嚟探佢，但我見到佢咁辛苦真係好心痛，本身想話多謝佢一直以嚟咁錫我哋就真，不過因為唔想畀佢見到我喊所以轉身行開咗，到尋日再去醫院佢已經冇再郁過，我仲未來得及多謝佢佢就已經走咗」。