吳浩康（Deep）太太郭思琳（Margiela）於九月十四日順利誕下兒子，重8磅11安士，Deep今日（二十日）向大家報喜，「太太原本諗住順產，但係去到醫院嘅時候個子宮頸仲未打開，未ready俾囝囝出嚟，醫生建議落催生藥，因為落咗催生藥後會不時有陣痛，仲要係幾犀利嘅陣痛，太太一路承受住痛楚，醫生同護士亦都同佢講子宮頸唔係好ready，唔ready嘅程度係，人哋有一至十度，我太太係一度都冇，太太內心失望之餘亦都好擔心，當然佢亦都好期待囝囝嘅出現，但始終冇呢方面嘅經驗，所以就會再擔心啲。佢足足經歷咗十七個鐘頭嘅呢個狀況。我有剪臍帶。」
他又說：「我去到醫院嘅時候，姑娘第一句就同我講：『其實你太太真係好忍得痛，佢可以咁樣頂，仲頂咗咁多個鐘。』所以真係好佩服太太，同埋真係好多謝佢，一啲都唔簡單，希望我可以繼續好好配合佢嘅生活啦。最後多謝大家、媒體對我哋一家人嘅關心、所有人對我哋嘅祝福，多謝晒。」
思琳在社交平台留言：「呢十個月以嚟唔知幻想咗幾多次你係點嘅樣，一直知你係大碼B，只係估唔到有份量成咁，亦估都估唔到自己肚仔可以佗到個8磅11嘅BB…怪唔知催生咗17個鐘你都唔肯出嚟啦，原來係大件到出唔到嚟…今次呢個生育過程真係痛不欲生，最難捱嘅係好想順產，但一直催生到開刀前都等唔到宮頸打開，淨係不斷地feel到劇烈陣痛…. 不過最後見證住你平安出世，呢樣先係最緊要!（我仲好記得喺產房Deep爸爸聽到你第一下喊聲，佢開心到好似中獎咁成個彈起!」