今日5月20日，520是網絡情人情，鄧小巧於這個特別的日子推出虐心情歌《討好式戀愛》，歌曲由小巧好友江海迦（AGA）作曲。去年中，小巧跟AGA茶敍兼邀歌，AGA便開始做功課，小巧表示：「佢（AGA）返去再聽多咗我以前嘅歌、聽我聲線運用，然後又再喺《Singaholic》度聽咗我好多翻唱歌，發現原來我會揀某啲歌翻唱，佢覺得我對某一啲歌有喜好，再根據對我聲音理解，然後就寫咗個melody。」
小巧透露，其實歌曲早於半年前已寫好，不過當中發生了小插曲，「佢寫好咗大半嘅時候，個電腦死咗跟住又有演唱會，一路都未整好部電腦，一路都收唔到佢首歌，直到今年一月收到佢嘅demo，佢send咗一半俾我聽，佢話『你睇吓呢個版本你鍾唔鍾意？』我聽到之後，嘩！冇理由會唔鍾意！一聽已經覺得太好聽啦！AGA真係寫得太好啦！」小巧隨後便跟同公司商量，無論如何都要這首歌。
歌詞方面則由小巧操刀，一開始她跟AGA表示，想寫一首關於「有多相愛便會有多傷害」的歌，「兩者係一個共同存在。收到呢首歌嘅時候，我覺得有一種小小病態嘅優雅，無論點都要保持一種微笑，就算流緊血都要保持微笑嘅一種狀態，所以我就寫咗呢首叫《討好式戀愛》。」小巧坦言，歌名來自網絡搜尋，歌詞靈感則來自朋友或自身有過的經歷，「當你喺一個比較脆弱、比較自我價值低嘅時候，通常戀愛模式都係一個討好式戀愛模式，於是啟發咗我去寫呢一首歌。」小巧強調，這首歌完全沒有「忠告」意味，「我並冇叫人離開或者唔離開，你知道你係討好緊呢一個人，屈就自己嚟就住呢一個人嘅狀態。其實你最後幾時先會move on、會唔會move on？喺你呢一個moment係唔緊要，因為有時候戀愛係一個歷程，有時可能你要經歷過一啲苦戀，先至可以得到一啲正果，我覺得你知道就得啦！」
歌曲監製找來舒老闆舒文，亦是二人的首次合作。小巧謂早已聽聞一些舒文的傳聞，她笑說：「即係一隻字會唱幾多百次、同一個位唱唱唱，唱到懷疑自己已經唔識唱歌等等，哈哈！」所以一開始找舒文監製時，小巧十分忐忑，「我會諗，如果自信被擊敗會點樣？自己承唔承受到呢？」錄音過後，小巧坦言這個決定做得太好，「因為舒老闆對聲音、對咬字好理解好清晰，佢亦都對成首歌邊一啲字，點樣去用力、點樣去用感情，俾好多好實在指導。雖然過程要做好多好多次，但我覺得係一個好好好滿足嘅過程，不斷學習、不斷吸收。」
MV方面，小巧亦做了很多前期工夫，因為今次MV是一個有故事發展的劇情，她特意找了好友蝦頭（楊詩敏）上戲劇課，「學吓肢體點樣去入戲、分析角色、點樣喺角色加啲前置，其實係一個學習，對我唱歌都好有用。」MV當中更加了不少小巧的生活日常，可算是為她度身訂造，「譬如我啲生活習慣係會煮嘢俾老公食，我會做陶瓷、打掃衛生，其實導演阿陞係根據我個人本身質地去做角色設定。」
