由於最近都在instagram分享一些關於depression的想法，很希望有更多人能夠看到，更希望《明周》讀者能夠看得到，故此今期再次分享這篇文章。
早排腰傷實在帶來好多不便，打亂咗正常嘅生活節奏和恆常嘅運動。而家能夠重拾exercise，感覺又回歸番自己的身體節奏。早已經唔係單純肥瘦嘅追求而係側重身心嘅平衡追求。不過，身體健康之餘，更重要嘅係精神（心靈上）的健康。記得我有抑鬱症嘅時候，體重暴升，我當時沒有上磅亦冇想知嘅意欲，因為我處於人生「半放棄狀態」，失去動力冇目標自我形象跌至零，亂咁食係咁食半夜食成為Mi當時嘅錯誤發洩，當負面情緒一嚟Mi就會開始「摷嘢食」，用食物遮蓋內心嘅痛苦，每吃一囗就彷佛可以將痛苦吞番入肚，用食物鎮壓情緒，最終肥到唔想面對。所以Mi好明白在黑洞裏的無力和失控，而呢種痛苦並唔係「睇開ｄ啦」「唔好諗咁多」「積極ｄ啦」就可以解開呢種憂鬱糾纏。就好似一個生水痘嘅人你冇可能叫佢睇開ｄ啦佢就會好番，生水痘到痊癒是一個過程；depression亦然，生水痘嘅人並唔係自己攞嚟，憂鬱病亦都唔係自己攞嚟嘅病，所以，作為旁人先要認清這一點。而同理心並不一定要強迫聆聽者感同身受甚至有切膚之痛，但能夠理解「病者並唔係自己攞嚟嘅」「我願意聆聽你」，其實是第一步。當我們理解病者並唔係無病呻吟，而係腦裏缺少咗某種分泌又或者身心理正值絮亂混沌無力憂鬱或者躁動，先至會出現depression。不過，我看見亦有很多人是因為從來甚至從小也沒有好好處理生命中大大小小嘅傷痛和不快經歷，而日積月累抑壓成depression，不過响depression嘅過程，（除了看專業醫生）其實我們亦有些東西可以作為額外配合加強自救，Mi嘅實戰經驗係──做吓運動。Mi用做「吓」運動嚟形容，而唔係直接用「做運動」嚟形容，是因為我好明白做運動對很多人嚟講，好辛苦好唔情願亦唔習慣。「做運動」就等於「好辛苦」三個字。而對於一個正值憂鬱嘅人亦好難馬上投入很重型嘅運動，而我所講嘅係，start with 比較輕巧嘅exercise，例如急行，慢走，俾身體同大自然接觸，俾身體的毛孔通過流汗好好疏洩，汗水據說能排毒，而通過運動付出而流汗，其實某程度上都是在排解心靈壓抑着的無名負面能量（毒素）（垃圾）。運動過程你會專注於運動腦袋沒有多餘時間俾自己陷入憂鬱混沌或躁鬱，甚至可以將負面情緒變成一種正面動力，一邊流汗一邊專注於當下嘅運動，完事後，你會發現心頭的重壓，會少咗。真嘅，如果你感到depression，不妨開始做「吓」運動，流少少汗，從中感受運動帶嚟嘅好感覺。Depression絕對可以治癒，由病發到痊癒有一個過程，而運動是其中一個很好的隱形良藥。打咁多字，Mi有散光眼都花埋，其實只想鼓勵有depression嘅朋友們，你們的感受，我懂。共勉之。愛你們。