【明報專訊】鄭伊健、陳小春、錢嘉樂、林曉峰與謝天華過去9個月走遍20個地方舉行《歲月友情世界巡迴演唱會》，日前於馬來西亞雲頂舉行終結篇，5個古惑佬送上驚喜，齊齊跑到觀眾席中間唱《當年情》，湯盈盈又帶同兩女兒捧場，錢嘉樂自彈自唱冧老婆，令湯盈盈及好多觀眾都感動。
錢嘉樂的父母、老婆湯盈盈與3歲大女凱晴和9個月大的細女凱琪專程前來捧場，當嘉樂與其他4子跑到人群中唱歌時，觀眾起哄在通道上攔着他們握手又合照，但嘉樂眼中只有老婆和大女，情不自禁蹲在地上與女兒玩。之後盈盈抱細女入場，在台上的嘉樂更變本加厲，只顧跟台下兩個寶貝女揮手，懶理幾兄弟正在合唱。盈盈聽見老公唱出歌詞「盈盈所有快樂能一起分享擁有，有幸這生不獨奏」後，即向嘉樂送飛吻！
5子因電影《古惑仔》系列結緣，演唱會上觀眾會大叫他們戲中名字，「山雞」小春風騷自封「雞爺」，伊健則得戚chok爆說：「正確係『銅鑼灣只有一個陳浩南』！」他們又講心底話，小春笑言不滿監製錢國偉偏心伊健，舞台效果他最靚，雖然小春部分亦有煙花效果，但他笑言只得8呎不夠。謝天華取笑4個兄弟的舞技仍有待改進，錢嘉樂亦笑天華整天插袋太chok。林曉峰不點名指有人成日黑面，小春扮嬲說：「你話我呀？」
娛樂組
■更多娛樂猛料 ﹕ol.mingpao.com