一連三場的《Remember記得・鍾嘉欣演唱會》佛山站，昨晚（1日）假嶺南明珠體育館圓滿落幕，鍾嘉欣（Linda）繼早前在廣州開騷後，相隔三個月再舉行個唱，反應依然熱爆，三場均座無虛席，Linda更罕有獲父母及孺囡Anika由溫哥華飛到佛山捧場，難怪Linda指佛山站演唱會，對她來說別具意義。
今次佛山站，雖然跟之前廣州站一樣，Linda以經典金曲《一顆不變的心》為演唱會揭開序幕，不過個唱流程、舞台設計、服裝及燈光效果卻截然不同，她說：「有咗上次經驗，今次心態有啲唔同，亦都變得輕鬆咗，今次重點反而係點樣令個演唱會進步，睇返之前片段、觀眾反應，從而去調節，希望每場演出都俾到觀眾新鮮感，令觀眾覺得值得嚟睇，亦因為每場變化，令自己有一份刺激感。」
Linda指，佛山站演出除保留「扔花球」，還加插「民選」歌曲環節，Linda表示：「扔花球環節，我同樣會親手寫上一個特別message放喺花球，但今次我最難忘係民選歌曲環節，事先俾網民揀選喜歡歌曲，然後我再去唱；仲有一個環節，係觀眾一齊唱《月亮代表我的心》，令我好感動，因為我依家住得比較遠，但仍然可以心連心，保持着呢種關係好難得，當望見月亮時，不論身在何地，仍然好似連繫住咁，而呢首歌，亦係劇集《護花危情》一首好重要嘅歌，好代表到我嘅愛。」
猶記得廣州站個唱，一班好姊妹及好友到場，令Linda大感驚喜，而今次佛山站亦有「重量級」觀眾撐場，Linda說：「係我好重要嘅人嚟睇我演唱會，佢哋係我阿爸阿媽同埋細囡，其實我入行咁耐，阿爸阿媽好少機會睇我演出，阿爸直頭未睇過，好開心佢哋終於可以睇到，親身見證佢哋個女努力嘅表現。因為我大囡同個仔都要返學，所以淨係細囡嚟，佢都係第一次睇我演出，佢反應好興奮，雖然佢戴住耳塞，但都睇到又跳又唱。」Linda還感謝監製好友梅小青及劉家豪撐場；Linda續說，獻唱《做你的晨曦》時，被觀眾席上的媽媽感動到喊，「呢首歌講我對女兒嘅愛，因為今次媽媽在場，唱呢首歌時會憶起好多媽媽湊我嘅回憶，令我忍唔住喊，冇諗過自己會喊，好感動，所以每次望到觀眾席上爸爸媽媽同個囡，我都要避開視線。」
提到孺囡Anika，Linda表示三名子女當中，她覺得Anika最有機會繼承其表演的「衣砵」：「佢雖然最細個，只有兩歲，但性格比較外向，把聲好大聲又清脆，唱歌應該會幾好聽，而且佢一聽到音樂及拍子聲就會跳舞，好有節拍感。」
個唱後，Linda透露一家五口將會來港過聖誕節，對此心情十分興奮，她說：「老公疫情後都返過香港，佢好期待，因為佢有好多親戚喺香港，其實三個小朋友都嚟過香港，佢哋好鍾意香港呢個地方，覺得香港好方便、好多姿多彩，就算行街買衫嘅款式都比加拿大多，每次返嚟香港，佢哋都會學到好多廣東話，我都想帶佢哋返嚟多啲！」
