《開心無敵獎門人》明晚（18日）將播出特別版《獎門人開心感謝祭》，由「獎門人」曾志偉帶領五位「獎老」錢嘉樂、阮兆祥、麥美恩、程浩駿及林穎彤擔任主持。今集嘉賓陣容有「一Bob即中隊」林盛斌（Bob）、蔡卓妍（阿Sa）、麥玲玲、沈震軒、湯怡及麥秋成，及「豬隊友隊」林夏薇、湯洛雯、譚俊彥、黃智賢、崔建邦及黃子恆。
是集「綜藝大玩家」Bob再次帶隊狂放笑彈，隊員玲玲師傅與入行22年首次上《獎門人》的阿Sa仲大鬥性感，非常搏命！話說第一回合「估嘢食」，「一Bob即中隊」竟率先派出身形嬌小的阿Sa孭起重量級代表阿Bob，一開始阿Sa仍很輕鬆地讚件砵仔糕好好味，豈料後勁不繼，當阿Sa再次彎腰食嘢時，已明顯成身震晒兼要撳枱大嗌：「真係好重呀！」最爆笑是阿Sa之後僅以「平時我阿婆會整俾我飲」來形容「陳皮」，搞到跟「Sa婆」素未謀面的Bob無奈苦呻：「我都唔識你阿婆……」由於Bob估極唔中，化身「人肉千斤頂」的阿Sa終於頂唔順慘叫：「好痛呀我條腰，快啲估呀！」場面爆笑。
之後輪到身材姣好的玲玲師傅出場，她甫俯身即引起全場「嘩嘩聲」，而同隊的阿Sa亦絕不失色，她在「大電視」環節玩到小蠻腰都出埋嚟，相當吸睛！及後玩「彈遮遮」時，沈震軒也不讓女士們專美，換上黑色背心，晒出一雙麒麟臂，連身旁的玲玲師傅也忍不住出手狂捽，並笑到見牙唔見眼，「嘩！幾好福利呀！」
繼上月於台慶夜趣劇《一封信》中連灌5杯牛奶後，Bob於「辣辣壽桃」環節再次上演「灌奶」經典場面，事緣遊戲期間獎門人忽然「搬龍門」，明明贏Game的Bob被要求飲奶「賀一賀」，身旁的嘉樂即「食花生」笑稱會配合對方說出《一封信》對白；此時沒好氣的Bob衰多口說：「咁細（杯）嘅？」獎門人聞言秒換「大杯奶」，Bob即時唞大氣，更喝罵仍寸「杯嘢太細杯」的嘉樂：「唔好再講喇！」最後Bob一口氣乾掉兼冇再嘔奶，非常專業！
另外，湯洛雯玩「啜乒乓」時，戀情遭擺上枱，每當她上前啜波時，現場嘉賓、主持即起鬨大叫其男友「馬國明」三個字，搞到湯洛雯分晒心要嗌停。
